കോട്ടയം: ജയസൂര്യയെ നായകനാക്കി ജിതിൻ കെ. ജോസ് സംവിധാനം ചെയ്യുന്ന മിസ്റ്ററി ത്രില്ലർ ചിത്രം 'മായൻ ചാപ്റ്റർ 1'ലെ ആദ്യ ഗാനം 'കൊല്ലിപ്രാക്ക്' പുറത്തിറങ്ങി.
കാലങ്ങള്‍ക്കപ്പുറത്തുനിന്ന് മുഴങ്ങുന്നൊരു പുരാതന ശബ്ദവും പതിവില്‍ നിന്ന് വ്യത്യസ്തമായ സംഗീതാവിഷ്കാരവും ചേർന്നാണ് ഗാനം പ്രേക്ഷകരിലേക്ക് എത്തിയിരിക്കുന്നത്. മുജീബ് മജീദ് സംഗീതം ഒരുക്കിയ ഗാനത്തിന് വരികള്‍ എഴുതിയിരിക്കുന്നത് രാജീവ് ഗോവിന്ദനാണ്.
ജോണ്‍സ് റോയിയും എക്കോസ് ക്വയർ എൻസെംബിളും ചേർന്നാണ് ഗാനം ആലപിച്ചിരിക്കുന്നത്. മാജിക് മൂണ്‍ പ്രൊഡക്ഷൻസിന്റെ ബാനറില്‍ രാജീവ് ഗോവിന്ദൻ നിർമ്മിക്കുന്ന ചിത്രം ഡിസംബർ 3ന് ആഗോള റിലീസായി തിയേറ്ററുകളിലെത്തും.
ചിത്രത്തിന്റെ നിഗൂഢമായ കഥാലോകത്തിലേക്കുള്ള ആദ്യ സംഗീതസൂചനയായാണ് 'കൊല്ലിപ്രാക്ക്' അവതരിപ്പിച്ചിരിക്കുന്നത്. പതിവ് ഗാനങ്ങളില്‍ നിന്ന് വ്യത്യസ്തമായ പരീക്ഷണാത്മക ശബ്ദവിന്യാസവും കാലാതീതമായൊരു താളവും ഗാനത്തിന് പ്രത്യേക സ്വഭാവം നല്‍കുന്നു. പുരാതനമായൊരു രഹസ്യത്തിന്റെ പ്രതിധ്വനി പോലെ അനുഭവപ്പെടുന്ന സംഗീതം ചിത്രത്തിന്റെ പ്രമേയത്തോടുള്ള കൗതുകവും വർധിപ്പിക്കുന്നു.
നേരത്തെ പുറത്തിറങ്ങിയ ടീസർ സൃഷ്ടിച്ച ആകാംക്ഷയ്ക്ക് പിന്നാലെ എത്തിയ ആദ്യ ഗാനവും 'മായൻ ചാപ്റ്റർ 1'ന്റെ വേറിട്ട അവതരണശൈലിയിലേക്കുള്ള സൂചനയാണ് നല്‍കുന്നത്.
'ബിയോണ്ട് ദ ഷാഡോസ്' എന്ന ടാഗ്‌ലൈനോടെ എത്തുന്ന ചിത്രത്തില്‍ പോലീസ് ഓഫീസറുടെ വേഷത്തിലാണ് ജയസൂര്യ അഭിനയിക്കുന്നത്. കേരളത്തിലെ ചില പുരാതന ക്രിസ്തീയ കുടുംബങ്ങളുമായി ബന്ധപ്പെടുത്തി പറയപ്പെടുന്ന കുപ്രസിദ്ധമായ 'കറുത്തച്ചനൂട്ട്' എന്ന ദുരൂഹ ആചാരത്തിന് പിന്നിലെ രഹസ്യങ്ങളിലേക്കാണ് ചിത്രത്തിന്റെ ടീസർ വെളിച്ചം വീശിയത്.
നൂറ്റാണ്ടുകള്‍ പഴക്കമുള്ള രഹസ്യ ആചാരങ്ങളും ലോകത്തിന്റെ വിവിധ ഭാഗങ്ങളില്‍ ഒളിഞ്ഞുകിടക്കുന്ന ശക്തികളും തമ്മിലുള്ള ബന്ധമാണ് സിനിമയുടെ കഥാപരിസരമെന്ന സൂചനകളും നേരത്തെ പുറത്തുവന്നിരുന്നു. നിഗൂഢതയും ഉദ്വേഗവും നിറഞ്ഞ ടീസർ പ്രേക്ഷകർക്കിടയില്‍ വലിയ കൗതുകമാണ് സൃഷ്ടിച്ചത്.
'കളങ്കാവല്‍' എന്ന ചിത്രത്തിന് ശേഷം ജിതിൻ കെ. ജോസ് സംവിധാനം ചെയ്യുന്ന ചിത്രമാണിത്. 'ഓർഡിനറി', 'അനാർക്കലി' തുടങ്ങിയ വിജയചിത്രങ്ങള്‍ നിർമ്മിച്ച രാജീവ് ഗോവിന്ദൻ മാജിക് മൂണ്‍ പ്രൊഡക്ഷൻസിന്റെ ബാനറില്‍ ഒരുക്കുന്ന മൂന്നാമത്തെ സിനിമ കൂടിയാണ് 'മായൻ ചാപ്റ്റർ 1'.
റാഫിയും ജിതിൻ കെ. ജോസും ചേർന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. നൈല ഉഷയാണ് നായിക. വിജയ് ബാബു, ഐശ്വര്യ രാജ്, ജിബിൻ ഗോപിനാഥ് എന്നിവരും ചിത്രത്തില്‍ നിർണായക കഥാപാത്രങ്ങളായി എത്തുന്നു. ചിത്രീകരണം പൂർത്തിയായ സിനിമയുടെ പോസ്റ്റ് പ്രൊഡക്ഷൻ ജോലികള്‍ പുരോഗമിക്കുകയാണ്.
