കൊച്ചി: കൊച്ചിയില് ജിഎസ്ടി ജോയിൻ കമ്മീഷണറുടെ ഓഫീസിലും വീട്ടിലും വിജിലൻസ് നടത്തിയ പരിശോധനയില് 14 ലക്ഷം രൂപയും 788 യൂ എസ് ഡോളറും പിടിച്ചെടുത്തു.
എറണാകുളം ജില്ലാ ജി.എസ്.ടി ടാക്സ് പേയര് സര്വ്വീസ് ജോയിന്റ് കമ്മീഷ്ണര് പ്രജനി രാജന്റെ പച്ചാളതെ വീട്ടിലും, ഓഫീസിലും ആയിരുന്നു പരിശോധന. തേവര ജിഎസ്ടി കോംപ്ലക്സിലെ സംസ്ഥാന ജോയിന്റ് കമ്മിഷണറുടെ ഓഫിസിലും വീട്ടിലും ഒരേ സമയമാണ് സംഘം പരിശോധനയ്ക്ക് എത്തിയത്. പച്ചാളത്തെ വീട്ടില് ഉദ്യോഗസ്ഥർ പരിശോധനക്ക് എത്തിയപ്പോള് മുറിയില് സൂക്ഷിച്ച പണം മാറ്റാൻ ഉദ്യോഗസ്ഥ ശ്രമിച്ചെങ്കിലും വിജിലൻസ് സംഘം പണം പിടികൂടുകയായിരുന്നു. തന്റെ ലോഡ്ജില് നിന്നുള്ള മാസ വരുമാനമാണ് പണം എന്നായിരുന്നു ഉദ്യോഗസ്ഥയുടെ മൊഴി. യാത്ര ആവശ്യത്തിനായി കരുതിയതാണ് യുഎസ് ഡോളർ എന്നും ഉദ്യോഗസ്ഥ മൊഴി നല്കിയിട്ടുണ്ട്.
കഴിഞ്ഞ 10 വർഷത്തിനിടയില് 63 ശതമാനം വരുമാനത്തേക്കാള് ഉയർന്ന സമ്പാദ്യം ഉദ്യോഗസ്ഥയ്ക്ക് ഉണ്ടായി എന്നാണ് വിജിലൻസിന്റെ കണ്ടെത്തല്. മൂവാറ്റുപുഴ കോടതിയില് രണ്ടുദിവസം മുൻപ് എഫ്ഐആർ സമർപ്പിച്ച ശേഷം ആയിരുന്നു മിന്നല് പരിശോധന. പരിശോധനയില് ലഭിച്ച പണവും വിദേശ കറൻസിയും തിങ്കളാഴ്ച കോടതിയില് ഹാജരാക്കുമെന്ന് വിജിലൻസ് അറിയിച്ചു.
