കോട്ടയം: - എറണാകുളം -കോട്ടയം പാതയിലെ അതിരൂക്ഷമായ യാത്രാക്ലേശം പരിഹരിക്കുവാൻ കൊല്ലം - കോട്ടയം മെമ്മു ട്രയിൻ എറണാകുളത്തേക്ക് നീട്ടിയത് യാത്രക്കാരുടെ യഥാർത്ഥ ആവശ്യം അറിഞ്ഞു കൊണ്ടുള്ളതല്ലന്ന് ഫ്രാൻസിസ് ജോർജ് എം.പി.പറഞ്ഞു.
വൈകുന്നേരം എറണാകുളം കോട്ടയം റൂട്ടിലെ യാത്രാക്ലേശം പരിഹരിക്കണമെങ്കിൽ വേണാടിന് മുമ്പ് പുതിയ മെമ്മു സർവ്വീസ് ആരംഭിക്കണം.
ഇപ്പോഴത്തെ നിർദ്ദേശമനുസരിച്ച് എറണാകുളത്ത് നിന്ന് 5.10 ന് വേണാട് പുറപ്പെട്ട് 15 മിനിറ്റ് കഴിഞ്ഞാണ് പുതിയ മെമ്മു പുറപ്പെടുക. നിലവിൽ 6.15ന് കോട്ടയത്തേക്ക് പാസഞ്ചർ ഉണ്ട്.
എറണാകുളത്ത് നിന്ന് 1.55 ന് പുറപ്പെടുന്ന പരശുറാം എക്സ്പ്രസിന് ശേഷം നിലവിൽ കോട്ടയം ഭാഗത്തേക്ക് 5.10 ന് ഉള്ള വേണാടിന് മുമ്പ് ട്രയിനുകൾ ഒന്നുമില്ല. അതിനാൽ ആണ് വേണാടിന് മുമ്പ് പുതിയ ട്രയിൻ എന്ന ആവശ്യം എല്ലാവരും ഉന്നയിക്കുന്നതെന്ന് അദ്ദേഹം പറഞ്ഞു.
3.25 ന് കോട്ടയത്ത് നിന്ന് തിരുവനന്തപുരത്തേക്ക് പുറപ്പെടുന്ന പരശുറാം എക്സ്പ്രസിന് ശേഷം 5.40 ന് കോട്ടയത്ത് നിന്ന് പുറപ്പെട്ടിരുന്ന കോട്ടയം കൊല്ലം മെമ്മുവിനെയാണ് ചങ്ങനാശ്ശേരി,തിരുവല്ല, ചെങ്ങന്നൂർ,മാവേലിക്കര തുടങ്ങിയ സ്ഥലങ്ങളിലേക്കുള്ള യാത്രക്കാർ മുഖ്യമായും ആശ്രയിച്ചിരുന്നത്.
പുതിയ സമയക്രമീകരണം അനുസരിച്ച് ഈ മെമ്മു ട്രയിൻ 6.45 ന് മാത്രമെ കോട്ടയത്ത് എത്തുകയുള്ളുയെന്ന് ഫ്രാൻസിസ് ജോർജ് ചൂണ്ടിക്കാട്ടി.
സർക്കാർ ജീവനക്കാർ, സ്വകാര്യ മേഖലയിലെ ജീവനക്കാർ, വിദ്യാർത്ഥികൾ എന്നിങ്ങനെ നൂറ് കണക്കിന് യാത്രക്കാരെ പുതിയ തീരുമാനം ദോഷകരമായി ബാധിക്കും. സ്വഭാവികമായും ഇവരെല്ലാം ആദ്യം വരുന്ന വേണാടിൽ കയറാൻ ശ്രമിക്കും.ഇത് അനിയന്ത്രിതമായ യാത്രാക്ലേശത്തിനും ദുരിതത്തിനും ഇടയാക്കും.
കോട്ടയം എറണാകുളം പാതയിലെ യാത്രാക്ലേശത്തിന് ശാശ്വത പരിഹാരം ഉണ്ടാകുവാൻ ബംഗളൂരു എറണാകുളം ഇൻ്റർസിറ്റി എക്സ്പ്രസ്, പാലക്കാട് എറണാകുളം മെമ്മു, ഗുരുവായൂർ എറണാകുളം എക്സ്പ്രസ്, പൂനൈ എറണാകുളം എക്സ്പ്രസ് എന്നീ ട്രയിനുകൾ കോട്ടയത്തേക്ക് നീട്ടുവാൻ അടിയന്തിര നടപടി സ്വീകരിക്കണമെന്ന് ഫ്രാൻസിസ് ജോർജ് ആവശ്യപ്പെട്ടു.
