കോഴിക്കോട് : നഗരത്തില്‍ ഭക്ഷ്യസുരക്ഷാ വകുപ്പ് നടത്തിയ പരിശോധനകളില്‍, ഹോട്ടലുകളിലും ബേക്കറികളിലും കണ്ടെത്തിയത് ഗുരുതര സുരക്ഷാ വീഴ്ചകള്‍.
കഴിഞ്ഞ മൂന്നു മാസങ്ങളിലായി 16 ലക്ഷം രൂപയാണ് വിവിധ സ്ഥാപനങ്ങള്‍ക്കായി പിഴ ചുമത്തിയിട്ടുള്ളത്.
ഹോട്ടലുകള്‍, തട്ടുകടകള്‍, മറ്റ് ഭക്ഷണശാലകള്‍ എന്നിവിടങ്ങളില്‍ ഭക്ഷണം പാകം ചെയ്യുന്നവരും വിതരണം ചെയ്യുന്നവരും നിർബന്ധമായും ഗ്ലൗസ്, ഹെയർ ക്യാപ് എന്നിവ ധരിക്കണമെന്ന ഭക്ഷ്യസുരക്ഷാ വകുപ്പിന്റെ കർശന നിർദ്ദേശം നിലനില്‍ക്കെയാണ് ഇതൊന്നും പാലിക്കാത്ത നിരവധി സ്ഥാപനങ്ങള്‍ക്കെതിരെ നടപടി സ്വീകരിച്ചത്.
കൈകളിലെയും നഖങ്ങള്‍ക്കിടയിലെയും അഴുക്കും രോഗാണുക്കളും ഭക്ഷണത്തില്‍ കലരുന്നതിലൂടെ ഇ-കോളി, സാല്‍മൊണല്ല തുടങ്ങിയ ബാക്ടീരിയകള്‍ ശരീരത്തിലെത്തി ഗുരുതര ആരോഗ്യപ്രശ്നങ്ങള്‍ക്ക് കാരണമാകുന്നു.
ഇതിന് പുറമെ ദിവസങ്ങളോളം പഴകിയ ഭക്ഷണം സൂക്ഷിക്കല്‍, മലിനജലം ഒഴുകുന്ന സ്ഥലങ്ങളില്‍ ഭക്ഷണം വില്‍ക്കല്‍, വൃത്തിഹീനമായ പാത്രങ്ങളിലും ദ്രവിച്ച ഉപകരണങ്ങളിലും ഭക്ഷണം തയ്യാറാക്കല്‍ തുടങ്ങിയ നിയമലംഘനങ്ങളും പരിശോധനയില്‍ കണ്ടെത്തി.
കഴിഞ്ഞ ദിവസമാണ് മലബാർ ക്രിസ്ത്യൻ കോളജിന് സമീപത്തെ ബട്ടർ ഹോംസ് സ്ഥാപനത്തില്‍ നടത്തിയ പരിശോധനയില്‍ ദിവസങ്ങളോളം പഴക്കമുള്ള ഭക്ഷ്യവസ്തുക്കള്‍ സൂക്ഷിച്ചിരുന്നതായി കണ്ടെത്തിയത്. പഴകിയ കറികള്‍, മസാലകള്‍, മസാലക്കൂട്ടുകള്‍, പഴങ്ങള്‍, പച്ചക്കറികള്‍, റൊട്ടി, ചപ്പാത്തി തുടങ്ങിയവയാണ് സൂക്ഷിച്ചിരുന്നത്. ബീച്ചിലെ ഫുഡ് സ്ട്രീറ്റില്‍ നടത്തിയ പരിശോധനയിലും സമാന വീഴ്ചയാണ് കണ്ടെത്തിയത്. തികച്ചും വൃത്തിഹീനമായി പ്രവർത്തിച്ച ഒരു കട പൂട്ടിയിടാൻ ഉത്തരവിടുകയും ആറ് കടകള്‍ക്ക് നോട്ടീസ് നല്‍കുകയും ചെയ്തു.
