കോട്ടയം: നെല്ലു സംഭരണത്തിന് സപ്ലൈക്കോയുമായുള്ള കരാർ നടപ്പാക്കാതെ ബ്ലാക്ക് ലിസ്റ്റില്‍ പെടുത്തേണ്ട സ്വകാര്യമില്ലുകള്‍ക്ക് ഈ വർഷവും നെല്ല് സംഭരിക്കുന്നതിന് ഭക്ഷ്യവകുപ്പ് പ്രത്യേക അനുമതി നല്‍കി.
എന്നാല്‍ കൃഷിച്ചെലവ് വർദ്ധന കണക്കിലെടുത്ത് നെല്ലിന്റെ വില ഉയർത്തണമെന്ന കർഷകരുടെ ആവശ്യം സർക്കാർ തള്ളി.
കഴിഞ്ഞ സീസണില്‍ കരാറിലേർപ്പെട്ടതും നിശ്ചിതസമയത്തിനകം നെല്ല് കുത്തി അരിയായി തിരിച്ചുനല്‍കാത്ത മില്ലുകളുമായി കരാറില്‍ ഏർപ്പെടാൻ സപ്ലൈക്കോയ്ക്ക് ഭക്ഷ്യ വകുപ്പു മന്ത്രി അനൂപ് ജേക്കബ് നിബന്ധനകളോടെയാണ് പ്രത്യേക അനുമതി നല്‍കിയത്.
കേന്ദ്ര സർക്കാർ കഴിഞ്ഞ മേയില്‍ നെല്ല് ക്വിന്റലിന് 72 രൂപ വർദ്ധിപ്പിച്ചിരുന്നു. ഇത് കൂടി ചേർത്താല്‍ കിലോയ്ക്ക് 30.72 രൂപ കർഷകർക്ക് ലഭിക്കണം. എന്നാല്‍ 30.12 രൂപ മാത്രമാണ് പുതിയ സംഭരണ വില. ഇതില്‍ 24.41 രൂപയും കേന്ദ്ര വിഹിതമാണ്.
35 രൂപയെങ്കിലും കിട്ടണം
ഉത്പാദന ചെലവിലുണ്ടായ വർദ്ധന അനുസരിച്ച്‌ 35 രൂപയെങ്കിലും കിട്ടിയാലേ നെല്‍കൃഷി നഷ്ടമാകാതിരിക്കൂ എന്ന് കർഷകർ ഒന്നടങ്കം ചൂണ്ടിക്കാട്ടുന്നു. നൂറ് കിലോ നെല്ല് കുത്തി അരിയാക്കുമ്പോള്‍ 66.5 കിലോ തിരിച്ചുനല്‍കണമെന്നാണ് കേന്ദ്ര സർക്കാർ നിബന്ധന. എന്നാല്‍ 64.5 കിലോയേ നല്‍കാനാവൂ എന്ന നിലപാടിലാണ് മില്ലുടമകള്‍. കർഷകരില്‍ നിന്ന് നെല്ല് സംഭരിക്കുമ്പോള്‍ ജലാംശവും പതിരും കൂടുതലെന്ന് ചൂണ്ടിക്കാട്ടി കിലോയ്ക്ക് 30.20 രൂപയ്ക്ക് പകരം 20 - 25 രൂപവരെയാണ് മിക്ക മില്ലുടമകളും നല്‍കുന്നത്. ഇത്തരം മില്ലുകളെ സംഭരണത്തില്‍ നിന്ന് ഒഴിവാക്കണമെന്ന് കർഷകർ ആവശ്യപ്പെടുന്നു.
നെല്ലിന്റെ സംഭരണ വില ഉയർത്തണമെന്ന കർഷകരുടെ ആവശ്യം അംഗീകരിക്കാതെ ബ്ലാക്ക് ലിസ്റ്റില്‍ പെടുത്തേണ്ട മില്ലുകളുടെ താത്പര്യമാണ് ഈ വർഷവും സർക്കാർ നടപ്പാക്കുന്നത്.
