കൊച്ചി : ഫോര്‍ട്ട് കൊച്ചിയില്‍ വീടുമാറി എക്‌സൈസിന്റെ റെയ്ഡ്. പുലര്‍ച്ചെ നാലരയോടെ എത്തി വീടിന്റെ പൂട്ട് തകര്‍ത്തു. ജനല്‍ പൊളിക്കാനും ശ്രമിച്ചു. നടപടി എക്‌സൈസ് സംഘം എന്നുപോലും അറിയിക്കാതെയാണെന്നും വീട്ടുകാര്‍ പറഞ്ഞു. വീട്ടില്‍ തനിച്ചുണ്ടായിരുന്ന യുവതി ഭയന്ന് വിറച്ച് ആശുപത്രിയിലായി. താന്‍ വീട്ടില്‍ ഒറ്റയ്ക്കാണെന്ന് പല തവണ പറഞ്ഞിട്ടും അതിക്രമം തുടര്‍ന്നെന്നും യുവതി പറഞ്ഞു.
ഇന്ന് പുലർച്ചയോടെയാണ് സംഭവം. ഉറങ്ങിക്കിടക്കുമ്പോള്‍ ജനല്‍ വഴി അടിയ്ക്കുന്ന ഫ്‌ളാഷ് ലൈറ്റുകള്‍ കണ്ടാണ് യുവതി ഞെട്ടി ഉണര്‍ന്നത്. വാതില്‍ തുറക്കെന്ന് പറഞ്ഞ് ഒരു സംഘം വാതിലില്‍ ശക്തിയായി ഇടിക്കുകയും ജനലുകള്‍ കുലുക്കുകയും ചെയ്യുന്നതാണ് കണ്ടത്. ഇവര്‍ എക്‌സൈസുകാരാണെന്ന് മനസിലായേതില്ല. കവര്‍ച്ചാ സംഘങ്ങളോ ഗുണ്ടകളോ ആണെന്ന് കരുതി വല്ലാതെ പരിഭ്രമിച്ചുവെന്നും മുക്കാല്‍ മണിക്കൂറോളം ഇത് തുടര്‍ന്നെന്നും യുവതി പറഞ്ഞു. ഈ അനുഭവത്തിന്റെ കടുത്ത ട്രോമയിലായ യുവതിക്ക് പിന്നീട് ചികിത്സ തേടേണ്ടിയും വന്നു.
എക്‌സൈസ് സംഘമെന്ന് പറഞ്ഞപ്പോള്‍ ഐഡി കാര്‍ഡ് കാണിക്കാന്‍ പോലും വിസമ്മതിച്ചെന്നാണ് ആരോപണം. ഭയന്നുപോയ യുവതി നൈറ്റ് ഡ്യൂട്ടിക്ക് പോയ ഭര്‍ത്താവിനെ വിളിച്ചുവരുത്തി. വീട്ടുകാരും എക്‌സൈസ് സംഘവും തമ്മില്‍ തര്‍ക്കിക്കുന്ന വിഡിയോയും പുറത്തുവന്നിട്ടുണ്ട്. വീട്ടുകാര്‍ പൊലീസിനെ വിളിച്ചെങ്കിലും ഞങ്ങള്‍ക്ക് പരിമിതികള്‍ ഉണ്ടെന്ന മറുപടിയാണ് പൊലീസില്‍ നിന്ന് ലഭിച്ചത്. വീട്ടുടമ ഇത് നിങ്ങള്‍ തേടിയെത്തിയ ആളുടെ വീടല്ല ഇതെന്ന് വിശദീകരിക്കാന്‍ ശ്രമിച്ചെങ്കിലും കുറേ സമയത്തേക്ക് അത് വിശ്വാസത്തിലെടുക്കാന്‍ പോലും എക്‌സൈസ് സംഘം തയ്യാറായില്ലെന്നും ആരോപണമുണ്ട്.
