ഡല്‍ഹി: രാജ്യ തലസ്ഥാനത്തെ രാംലീലാ മൈതാനിയില്‍ നവംബർ ഒന്നിന് നടക്കാനിരിക്കുന്ന ഇന്ത്യാസഖ്യത്തിന്‍റെ കൂറ്റൻ റാലിക്ക് മുന്നോടിയായി കേന്ദ്ര ആഭ്യന്തര മന്ത്രാലയവും ഡല്‍ഹി പൊലീസും സുരക്ഷാ സന്നാഹങ്ങള്‍ ശക്തമാക്കി.
വോട്ടർ പട്ടിക പരിഷ്കരണത്തിനെതിരെയും മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്‍റെ രാജി ആവശ്യപ്പെട്ടുമാണ് പ്രതിപക്ഷ പാർട്ടികള്‍ പ്രതിഷേധ റാലി സംഘടിപ്പിക്കുന്നത്.
ഡല്‍ഹി പൊലീസിലെ 3,000-ത്തോളം ഉദ്യോഗസ്ഥരെയും അർധസൈനിക വിഭാഗങ്ങളെയും പ്രദേശത്ത് വിന്യസിക്കും. നിരീക്ഷണത്തിനായി 150-ലേറെ എഐ അധിഷ്ഠിത സിസിടിവി ക്യാമറകളും താല്‍ക്കാലിക കണ്‍ട്രോള്‍ റൂമുകളും സ്ഥാപിച്ചിട്ടുണ്ട്.
സുരക്ഷാ സന്നാഹങ്ങള്‍ എളുപ്പത്തിലാക്കുന്നതിനായി മൈതാനവും പരിസരവും 8 റീജിയണുകളായും 14 സോണുകളായും തിരിച്ചു. വൈകുന്നേരം 5 മണിക്ക് മുൻപ് റാലി അവസാനിപ്പിച്ച്‌ പ്രവർത്തകർ പിരിഞ്ഞു പോകണമെന്ന് ഡല്‍ഹി പൊലീസ് കർശന നിർദേശം നല്‍കിയിട്ടുണ്ട്.
മൈതാനത്ത് രാത്രി തങ്ങാനോ മറ്റ് കേന്ദ്രങ്ങളിലേക്ക് മാർച്ചായി നീങ്ങാനോ അനുമതിയില്ല. റാലിയില്‍ പങ്കെടുക്കാൻ വിവിധ സംസ്ഥാനങ്ങളില്‍ നിന്ന് പ്രവർത്തകർ എത്തുന്നതിനായി പ്രത്യേക ട്രെയിനുകള്‍ അനുവദിക്കണമെന്ന് കോണ്‍ഗ്രസ് കേന്ദ്ര റെയില്‍വേ മന്ത്രാലയത്തോട് ആവശ്യപ്പെട്ടിട്ടുണ്ട്.
