പത്തനംതിട്ട: വടശ്ശേരിക്കര മേഖലയിലുണ്ടായ കാട്ടാന ശല്യം സർക്കാർ ഗൗരവത്തോടെയാണ് കാണുന്നതെന്ന് വനംവകുപ്പ് മന്ത്രി ഷിബു ബേബി ജോണ്.
വിഷയം പരിഹരിക്കുന്നതിനായി നേരത്തെ ഓണ്ലൈൻ യോഗം ചേർന്ന് സുപ്രധാന തീരുമാനങ്ങള് എടുത്തിരുന്നു. വലിയ ദുരന്തങ്ങളിലേക്ക് നീങ്ങാതെ ഈ പ്രതിസന്ധിയെ മറികടക്കാൻ എല്ലാവരും ഒറ്റക്കെട്ടായി സർക്കാരിനൊപ്പം നില്ക്കണമെന്ന് മന്ത്രി അഭ്യർഥിച്ചു.
പ്രദേശത്തെ പൈനാപ്പിള് തോട്ടങ്ങളാണ് കാട്ടാനകളെ പ്രധാനമായും ആകർഷിക്കുന്നതെന്നാണ് വനം വകുപ്പിന്റെ പ്രാഥമിക കണ്ടെത്തല്. ആനകളുടെ സഞ്ചാരപാതകള് കൃത്യമായി പഠനത്തിന് വിധേയമാക്കിയിട്ടുണ്ട്.
ആനകള് കാടിറങ്ങുന്നതും തിരികെ കയറുന്നതുമായ എക്സിറ്റ്-എൻട്രി പോയിന്റുകള് മാപ്പ് ചെയ്യുകയും പ്രദേശത്ത് നിരീക്ഷണത്തിനായി വാച്ചർമാരെ നിയോഗിക്കുകയും ചെയ്തു. വനവുമായി അടുത്ത് പരിചയമുള്ള പ്രദേശവാസികളെ കൂടി ഉള്പ്പെടുത്തി വാച്ചർമാരുടെ സേവനം കൂടുതല് കാര്യക്ഷമമാക്കുമെന്നും മന്ത്രി പറഞ്ഞു.
പ്രതിരോധ പ്രവർത്തനങ്ങളുടെ ഭാഗമായി ആധുനിക സാങ്കേതികവിദ്യയും പ്രയോജനപ്പെടുത്തുമെന്ന് മന്ത്രി അറിയിച്ചു. ആനകള് സ്ഥിരമായി എത്തുന്ന സ്ഥലങ്ങളില് നിരീക്ഷണത്തിനായി രണ്ട് എഐ ക്യാമറകള് സ്ഥാപിച്ച് മാപ്പിങ് നടത്തും.
അടിയന്തരമായി തെർമല് ഡ്രോണ് ഉപയോഗിച്ചുള്ള നിരീക്ഷണവും ഏർപ്പെടുത്തും. ഇതിനുപുറമെ, ഒരു കിലോമീറ്റർ ചുറ്റളവില് ആനകളുടെ സാന്നിധ്യമുണ്ടായാല് മുന്നറിയിപ്പ് നല്കുന്ന നൂതന സാങ്കേതികവിദ്യയും പ്രദേശത്ത് നടപ്പിലാക്കുമെന്നും മന്ത്രി ഷിബു ബേബി ജോണ് വ്യക്തമാക്കി.
ഒന്നോ രണ്ടോ തവണ ജനവാസ മേഖലയിലേക്ക് ഇറങ്ങുന്നത് തടയാൻ കഴിഞ്ഞാല് ആനകള് പിന്നീട് ആ വഴി ഉപേക്ഷിക്കുന്നതായാണ് കണ്ടുവരുന്നത്. ഇതിനായി കൃഷിയിടങ്ങള്ക്ക് ചുറ്റും ജൈവവേലികള് നിർമിക്കാൻ കർഷകരോട് ആവശ്യപ്പെടും.
ആനകളെ അകറ്റാൻ സഹായിക്കുന്ന മഞ്ഞള്, നാരകം എന്നിവയാണ് ജൈവവേലിയായി വെച്ചുപിടിപ്പിക്കുക. ഇതിന് വനം വകുപ്പിന്റെ പൂർണ പിന്തുണയും സഹകരണവും ഉണ്ടാകുമെന്നും മന്ത്രി ഉറപ്പുനല്കി.






