കോട്ടയം: കോട്ടയം കേന്ദ്രീകരിച്ച് പ്രവർത്തിക്കുന്ന ഹ്യൂമൻ റിസോഴ്സ് ഡെവലപ്മെന്റ് സ്ഥാപനമായ ഹഗ്ഗ് ഇന്റർനാഷണലും കൊല്ലം ശ്രീനാരായണ ഗുരു ഓപ്പൺ യൂണിവേഴ്സിറ്റിയും ധാരണാപത്രത്തിൽ (MoU) ഒപ്പുവച്ചു.
ഇരു സ്ഥാപനങ്ങളും ചേർന്ന് വിവിധ കോഴ്സുകൾ ആരംഭിക്കുന്നതിന്റെ ഭാഗമായാണ് ധാരണ.
യൂണിവേഴ്സിറ്റി ആസ്ഥാനത്ത് നടന്ന ചടങ്ങിൽ രജിസ്ട്രാർ പ്രൊഫ. (ഡോ.) അഭിലാഷ് ബാബുവും ഹഗ്ഗ് ഇന്റർനാഷണൽ സി.ഇ.ഒ. അനീഷ് മോഹനും ചേർന്ന് ധാരണാപത്രം കൈമാറി.
സിൻഡിക്കേറ്റ് അംഗങ്ങളായ കല്ലട ഗിരീഷ്, ഡോ. എസ്. ജയപ്രകാശ്, ഡോ. ഷീനു ജി.എസ്., കരിയർ ഗുരു ഡോ. ഐസക് തോമസ്, ഹഗ്ഗ് ഇന്റർനാഷണൽ
അഡ്മിനിസ്ട്രേറ്റർ ശ്രീദേവി വി.ജി., കോ-ഓർഡിനേറ്റർമാരായ ജസ്റ്റിൻ ജോസഫ്, നിഷ രാജൻ എന്നിവർ സന്നിഹിതരായിരുന്നു.
ഈ സഹകരണത്തിലൂടെ വിദ്യാർത്ഥികൾക്കും മുതിർന്നവർക്കും തൊഴിലന്വേഷകർക്കും
കരിയർ വികസനത്തിനും നൈപുണ്യ വികസനത്തിനും സഹായിക്കുന്ന കോഴ്സുകൾ ലഭ്യമാക്കാനാണ് ലക്ഷ്യമിടുന്നതെന്ന് അധികൃതർ അറിയിച്ചു.
നമ്മുടെ നാട്ടിൽ യഥാർത്ഥത്തിൽ തൊഴിലില്ലായ്മ ഇല്ല, ഇഷ്ടം പോലെ അവസരങ്ങളുണ്ട്.
എന്ത്, എവിടെ പഠിക്കണം എന്നതിൽ കുട്ടികൾക്ക് വ്യക്തതയില്ലാത്തതാണ് പലർക്കും ജോലി കിട്ടാതെ പോകാൻ
കാരണമെന്ന് ശ്രീനാരായണ ഗുരു ഓപ്പൺ യൂണിവേഴ്സിറ്റി വൈസ് ചാൻസലർ പ്രൊഫ. (ഡോ.) ജഗതി രാജ് വി.പി. പറഞ്ഞു.
ഇതിന് പരിഹാരമായാണ് യൂണിവേഴ്സിറ്റിയും ഹഗ്ഗ് ഇന്റർനാഷണലും ചേർന്ന് കരിയർ ഗൈഡൻസ് കോഴ്സ് ആരംഭിക്കുന്നത്.
പുതിയ തലമുറയ്ക്ക് ശരിയായ കരിയർ വഴി കാണിച്ചുകൊടുക്കാനും സ്വന്തമായി ഒരു കരിയർ കെട്ടിപ്പടുക്കാനും ഈ കോഴ്സ് സഹായിക്കും. അദ്ദേഹം കൂട്ടിചേർത്തു.






