തിരുവനന്തപുരം: എൻടിപിസിയുടെ കീഴിലെ സിന്നാർ താപ വൈദ്യുതി നിലയത്തില്‍ നിന്നുള്ള 540 മെഗാവാട്ട് വൈദ്യുതി കരാർ ഒപ്പിടുന്നതില്‍ കെഎസ്‌ഇബിക്ക് മെല്ലെപ്പോക്ക്.
സിന്നാറില്‍ നിന്ന് പവർ പർച്ചേസ് എഗ്രിമെൻ്റ് അയച്ചുകൊടുത്തിട്ടും കെഎസ്‌ഇബി ഒപ്പിട്ടിട്ടില്ല. മറ്റാർക്കും നല്‍കാതെ യൂണിറ്റിന് 5.18 രൂപയ്ക്ക് മുഴുവൻ സമയത്തേക്കും കേരളത്തിന് വൈദ്യുതി നല്‍കാനുള്ള ദീർഘകാല കരാറാണിത്.
സിന്നാർ അയച്ച പിപിഎ പൂഴ്ത്തിവച്ചാണ് ഹിമാചലിന്‍റെയും ജിഎൻഎയുടെയും ഉയർന്ന വിലയുള്ള വൈദ്യുതി വാങ്ങാനുള്ള നീക്കം നടക്കുന്നത്.
കുറഞ്ഞ നിരക്കില്‍ സിന്നാറില്‍ നിന്ന് വൈദ്യുതി ലഭിക്കാനുള്ള അവസരം നിലനില്‍ക്കെ, ഹിമാചല്‍ പ്രദേശ്, ജിഎൻഎ തുടങ്ങിയ ഉയർന്ന വിലയുള്ള പ്ലാറ്റ്‌ഫോമുകള്‍ വഴി വൈദ്യുതി വാങ്ങാനാണ് സർക്കാരും കെഎസ്‌ഇബിയും ശ്രമിക്കുന്നത്.
ഈ കരാർ ഒപ്പിട്ടാല്‍ കേരളം നേരിടാൻ പോകുന്ന വൈദ്യുതി പ്രതിസന്ധിക്ക് വലിയൊരളവോളം പരിഹാരമാകും. എന്നാല്‍ ഈ കരാർ പൂഴ്ത്തിവെച്ചാണ് മറ്റു നീക്കങ്ങള്‍ നടക്കുന്നത് എന്ന ഗുരുതര ആരോപണമാണ് ഉയരുന്നത്.
