സിനിമയിലെ സകലകലാവല്ലഭന്‍ കമല്‍ഹാസന് ഇന്ന് 72-ാം പിറന്നാള്‍. ആറാം വയസ്സില്‍ ബാലതാരമായി തുടങ്ങി ആറു ദശാബ്ദത്തിലേറെ ഇന്ത്യന്‍ സിനിമകളില്‍ വിവിധ മേഖലകളില്‍ നിറഞ്ഞുനിന്ന മറ്റൊരു താരം വേറെയില്ല. ദി എന്‍സൈക്ലോ പീഡിയ ഓഫ് ഇന്ത്യന്‍ സിനിമയെന്ന് തലമുറകള്‍ വാഴ്ത്തുന്ന അതുല്യപ്രതിഭ. പുതിയ കമല്‍ വിസ്മയങ്ങള്‍ക്കായി കാത്തിരിക്കുകയാണ് ആരാധകര്‍.
ആറാം വയസ്സില്‍ കളത്തൂര്‍ കണ്ണമ്മയില്‍ ബാലതാരമായിട്ടായിരുന്നു തുടക്കം.
കളത്തൂര്‍ കണ്ണമ്മയെന്ന ആദ്യചിത്രത്തിലൂടെ തന്നെ സെല്ലുലോയ്ഡിനെ അമ്പരപ്പിച്ച കൊച്ചുപയ്യന്‍. അന്നത്തെ മികച്ച ബാലതാരത്തില്‍ നിന്ന് ഇതിഹാസത്തിലേക്കുള്ള വളര്‍ച്ച ഇന്ത്യന്‍ സിനിമയുടെ കൂടി ചരിത്രമാണ്. വ്യത്യസ്തതയും പരീക്ഷണങ്ങളും മുഖമുദ്ര. ശബ്ദം കൊണ്ടും നോട്ടം കൊണ്ടും വേഷപ്പകര്‍ച്ച കൊണ്ടുമെല്ലാം അത്ഭുതങ്ങള്‍ സൃഷ്ടിക്കാനാകുമെന്ന് അദ്ദേഹം കാണിച്ച് തന്നു.
സിനിമയുടെ സമസ്തമേഖലകളിലും കൈയൊപ്പു പതിപ്പിച്ചു ഉലകനായകന്‍. അഭിനേതാവ് എന്നതിലുപരിയായി തിരക്കഥാകൃത്തായും സംവിധായകനായും ഗാനരചയിതാവായും ഗായകനായും സംവിധായകനായും നിര്‍മാതാവായും കമല്‍ ഹാസന് തിളങ്ങി.
മികച്ച ബാലതാരത്തിനുള്ള രാഷ്ട്രപതിയുടെ സ്വര്‍ണ്ണ മെഡല്‍ ഭാവി താരത്തിന്റെ വരവറിയിച്ചു. അസാധാരണമായ നടനവൈഭവം, മികച്ച നര്‍ത്തകന്‍, ആക്ഷന്‍ രംഗങ്ങളിലെ കൃത്യത… അങ്ങനയങ്ങനെ കമല്‍ഹാസനെ വേറിട്ടുനിര്‍ത്തുന്ന ഘടകങ്ങള്‍ ഒട്ടേറെയുണ്ട്.
നായകന്‍, ഇന്ത്യന്‍, അവ്വൈ ഷണ്‍മുഖി, ദശാവതാരം തുടങ്ങി ഉദാഹരണങ്ങളുടെ നീണ്ടനിര തന്നെയുണ്ട്. , മൂന്നാം പിറൈ, തേവര്‍ മകന്‍, അന്‍പേ ശിവം, വിക്രം, ഇന്ത്യന്‍, പാപനാശം, കല്‍ക്കി, മൈക്കിള്‍ മദന കാമരാജന്‍, പുഷ്പക വിമാന, ദശാവതാരം, വറുമയിന്‍ നിറം സിവപ്പ്, സാഗര സംഗമം, മദനോത്സവം തുടങ്ങിയ ചിത്രങ്ങള്‍ കമല്‍ഹാസനെന്ന പ്രതിഭയെ നമ്മുക്ക് കാട്ടിത്തരുന്നുണ്ട്.
നായകനായി തുടക്കം മലയാളചിത്രം കന്യാകുമാരിയിലൂടെ. കാമുകനായും വീരനായകനും അമാനുഷിക കഥാപാത്രമായും തീയറ്റുകള്‍ നിറച്ചു. ഉലകനായകനെന്ന് വിളിച്ച് ലോകം വാഴ്ത്തി. ഏറെ വിനയത്തോടെ ആ പേര് അദ്ദേഹം വേണ്ടെന്ന് വച്ചു. കലാകാരന്‍ കലയേക്കാള്‍ വാഴത്തപ്പെടാന്‍ പാടില്ലെന്ന അദ്ദേഹത്തിന്‍റെ വിശ്വാസമായിരുന്നു ഇതിന് പിന്നില്‍.
സധൈര്യം തന്‍റെ നിലപാടുകള്‍ തുറന്ന് പറഞ്ഞ് സിനിമയ്ക്ക് പുറത്തും വ്യത്യസ്തനായി. രാജ്യസഭയിലും അദ്ദേഹത്തിന്‍റെ ശബ്ദം കേട്ടു. കൂടുതല്‍ കമല്‍ മാജിക്കുകള്‍ക്കായി കാത്തിരിക്കുകയാണ് ലോകമെമ്പാടുമുള്ള ആരാധകര്‍.
