ഡൽഹി: നടപ്പ് സാമ്പത്തിക വർഷത്തിന്റെ ആദ്യ അഞ്ച് മാസങ്ങളില്‍ (ഏപ്രില്‍ - ഓഗസ്റ്റ്) രാജ്യത്തെ യഥാർത്ഥ വൈദ്യുതി ആവശ്യകത കേന്ദ്ര സർക്കാരിന്റെ കണക്കുകൂട്ടല്‍ തെറ്റിച്ചെന്ന് റിപ്പോർട്ട്.
മഴയുടെ കുറവും ഉയർന്ന താപനിലയുമാണ് പ്രതീക്ഷിച്ചതിലും അധികം വൈദ്യുതി ആവശ്യകതയിലേക്ക് രാജ്യത്തെ നയിച്ചത്. കേന്ദ്ര സെൻട്രല്‍ ഇലക്‌ട്രിസിറ്റി അതോറിറ്റിയുടെ ഹ്രസ്വകാല പ്രവചനങ്ങളേക്കാള്‍ കുറവാണ് സാധാരണഗതിയില്‍ യഥാർത്ഥ വൈദ്യുതി ഉപഭോഗം വരാറുള്ളതെങ്കിലും, ഇത്തവണ അത് പ്രവചിച്ചതിനേക്കാള്‍ 3.3 ശതമാനം ഉയർന്നതായി ഔദ്യോഗിക കണക്കുകള്‍ വ്യക്തമാക്കുന്നു.
കോവിഡ് മഹാമാരിക്ക് ശേഷം 2022-ലും (1.8%), 2023-ലും (0.75%) മാത്രമാണ് ഇതിനുമുമ്പ് ഇത്തരത്തിലൊരു വ്യതിയാനം രേഖപ്പെടുത്തിയിട്ടുള്ളത്. എന്നാല്‍ അന്നത്തേക്കാള്‍ വളരെ ഉയർന്ന നിരക്കിലാണ് ഇത്തവണത്തെ വർദ്ധനവ്.
സി.ഇ.എ നല്‍കുന്ന വിവരങ്ങളുടെ അടിസ്ഥാനത്തിലാണ് വൈദ്യുതി ഉല്‍പ്പാദന കമ്പനികള്‍ കല്‍ക്കരി ശേഖരണവും മറ്റ് പ്രവർത്തന രൂപരേഖകളും തയ്യാറാക്കുന്നത്. അതിനാല്‍, പ്രവചനങ്ങളിലുണ്ടായ ഈ വലിയ മാറ്റം രാജ്യത്തെ പവർ സിസ്റ്റം ആസൂത്രണത്തെയും കല്‍ക്കരി വിതരണത്തെയുമെല്ലാം കാര്യമായി ബാധിച്ചിട്ടുണ്ട്.
ഉപഭോഗം കുത്തനെ ഉയർന്നതോടെ വൈദ്യുതി ലഭ്യത ഉറപ്പാക്കാൻ കേന്ദ്ര ഊർജ്ജ മന്ത്രാലയം അടിയന്തര നടപടികള്‍ ആരംഭിച്ചു. ഇതിന്റെ ഭാഗമായി ഒക്ടോബർ 1 മുതല്‍ ഡിസംബർ 31 വരെ രാജ്യത്തെ 112 സ്വകാര്യ കല്‍ക്കരി അധിഷ്ഠിത പവർ പ്ലാന്റുകളോട് പരമാവധി ശേഷിയില്‍ പ്രവർത്തിക്കാൻ നിർദ്ദേശം നല്‍കിയിട്ടുണ്ട്. പ്രതിവർഷം തയ്യാറാക്കുന്ന ലോഡ് ജനറേഷൻ ബാലൻസ് റിപ്പോർട്ട് വഴിയാണ് റെയില്‍വേയും കല്‍ക്കരി കമ്പനികളും അടക്കമുള്ള സ്ഥാപനങ്ങള്‍ തങ്ങളുടെ പ്രവർത്തനങ്ങള്‍ ക്രമീകരിക്കുന്നത്.
എന്നാല്‍ സെപ്റ്റംബറോടെ ഉത്തരേന്ത്യയിലും കിഴക്കൻ സംസ്ഥാനങ്ങളിലും മഴ ലഭിച്ചതോടെ ഉപഭോഗത്തില്‍ നേരിയ കുറവ് വന്നിട്ടുണ്ടെന്ന് അധികൃതർ അറിയിച്ചു.
