തിരുവനന്തപുരം: സ്ഥലംമാറ്റം ധിക്കരിച്ച്‌ പുതിയ സ്റ്റേഷനില്‍ ചുമതലയേല്‍ക്കാതിരിക്കുകയും തുടര്‍ച്ചയായി ജോലിയില്‍ നിന്നും വിട്ടുനില്‍ക്കുകയും ചെയ്ത ഡിവൈഎസ്പി പൃഥ്വിരാജ് ഡി.കെയ്ക്കെതിരെ കടുത്ത നടപടിയുമായി സര്‍ക്കാര്‍ രംഗത്തെത്തി.
ഇതുസംബന്ധിച്ച്‌ ആഭ്യന്തര വകുപ്പ് ഔദ്യോഗിക ഉത്തരവ് പുറത്തിറക്കി. മുന്‍പ് പൊലീസ് അസോസിയേഷന്‍ നേതാവായിരുന്ന ഉദ്യോഗസ്ഥനെതിരെയാണ് വകുപ്പുതല അന്വേഷണത്തിന് (ഓറല്‍ എന്‍ക്വയറി) ഉത്തരവിട്ടിരിക്കുന്നത്. തിരുവനന്തപുരം ക്രൈംബ്രാഞ്ച് ആസ്ഥാനത്ത് പ്രവര്‍ത്തിച്ചുവരികയായിരുന്ന ഡിവൈഎസ്പി പൃഥ്വിരാജിനെ വയനാട് ജില്ലാ ക്രൈംബ്രാഞ്ചിലേക്ക് മാറ്റി സര്‍ക്കാര്‍ നേരത്തെ ഉത്തരവിട്ടിരുന്നു. മെയ് 30-ലെ ഉത്തരവിന്റെ അടിസ്ഥാനത്തില്‍ ജൂണ്‍ ഒന്നിന് അദ്ദേഹം ക്രൈംബ്രാഞ്ച് ആസ്ഥാനത്ത് നിന്നും ഔദ്യോഗികമായി വിടുതല്‍ നേടുകയും ചെയ്തു.
എന്നാല്‍ സ്ഥലംമാറ്റം ലഭിച്ച വയനാട്ടിലെ പുതിയ ഓഫീസില്‍ ചുമതലയേല്‍ക്കാന്‍ ഉദ്യോഗസ്ഥന് തയ്യാറായില്ല. സ്ഥലംമാറ്റ ഉത്തരവിനെതിരെ പൃഥ്വിരാജ് കേരള അഡ്മിനിസ്ട്രേറ്റീവ് ട്രൈബ്യൂണലിനെ (കെഎടി) സമീപിക്കുകയാണുണ്ടായത്. ഒ.എ. നമ്പര്‍ 829/2026 ആയി ഫയല്‍ ചെയ്ത കേസില്‍, അപ്പീല്‍ മൂന്ന് ആഴ്ചയ്ക്കകം പരിഗണിക്കാന്‍ ജൂണ്‍ രണ്ടിന് ട്രൈബ്യൂണല്‍ ഇടക്കാല ഉത്തരവ് പുറപ്പെടുവിച്ചിരുന്നു. തുടര്‍ന്ന് ജൂണ്‍ ഒമ്പതിന് നല്‍കിയ മറ്റൊരു ഉത്തരവില്‍, അപ്പീല്‍ പരിഗണിക്കുമ്പോള്‍ ഉദ്യോഗസ്ഥന്റെ അവധിക്കാല അപേക്ഷകളും കൂടി അധികാരികള്‍ പരിഗണിക്കണമെന്ന് ട്രൈബ്യൂണല്‍ നിര്‍ദ്ദേശിച്ചിരുന്നു.
ട്രൈബ്യൂണലിന്റെ ഇടക്കാല ഉത്തരവിന്റെ അടിസ്ഥാനത്തില്‍ സര്‍ക്കാര്‍ വിഷയം വിശദമായി പരിശോധിക്കുകയും, ഉദ്യോഗസ്ഥന് സമര്‍പ്പിച്ച അപ്പീല്‍ തള്ളിക്കൊണ്ട് ഉത്തരവ് പുറപ്പെടുവിക്കുകയും ചെയ്തു. തിരുവനന്തപുരത്തുനിന്നും വയനാട്ടിലേക്കുള്ള സ്ഥലംമാറ്റം പൂര്‍ണ്ണമായും ശരിവെച്ചുകൊണ്ടായിരുന്നു സര്‍ക്കാരിന്റെ ഈ നടപടി. ഇതുവഴി ഉദ്യോഗസ്ഥന്റെ വാദങ്ങളെല്ലാം സര്‍ക്കാര്‍ തള്ളിക്കളയുകയായിരുന്നു. ട്രൈബ്യൂണല്‍ നിര്‍ദ്ദേശപ്രകാരം, ഡിവൈഎസ്പി ഹാജരാകാത്ത കാലയളവിലേക്ക് ആവശ്യപ്പെട്ട അവധി അപേക്ഷകളും ഉന്നത ഉദ്യോഗസ്ഥര്‍ കര്‍ശനമായി പരിശോധിച്ചു. ക്രൈംബ്രാഞ്ച് എഡിജിപിയാണ് അവധി അപേക്ഷകള്‍ പരിശോധിച്ച്‌ തള്ളിക്കളഞ്ഞത്.
ഓഗസ്റ്റ് ഏഴിന് പുറത്തിറക്കിയ ഉത്തരവിലൂടെ അദ്ദേഹത്തിന്റെ അവധി അപേക്ഷകള്‍ പൂര്‍ണ്ണമായി നിരസിക്കുകയുണ്ടായി. ഇതിന് പുറമെയും ഓഗസ്റ്റ് 1 മുതല്‍ 10 വരെയുള്ള തീയതികളിലേക്കും, പിന്നീട് ഓഗസ്റ്റ് 11 മുതല്‍ 28 വരെയുള്ള തീയതികളിലേക്കും പൃഥ്വിരാജ് വീണ്ടും അവധി അപേക്ഷകള്‍ സമര്‍പ്പിച്ചിരുന്നു. എന്നാല്‍ മുന്‍ അപ്പീലുകളും അവധികളും തള്ളിക്കളഞ്ഞ സാഹചര്യത്തിലും, സ്ഥലംമാറ്റം നിലനില്‍ക്കുന്നതിനാലും ഈ തുടര്‍ അവധി അപേക്ഷകളും ബന്ധപ്പെട്ട അധികാരികള്‍ നിരസിക്കുകയാണുണ്ടായത്. തുടര്‍ന്ന് പൊലീസ് ആസ്ഥാനത്തുനിന്നും ഔദ്യോഗികമായ കര്‍ശന നിര്‍ദ്ദേശങ്ങള്‍ ഉദ്യോഗസ്ഥന് നല്‍കിയിരുന്നു.
ഓഗസ്റ്റ് 19 ലെ പൊലീസ് ആസ്ഥാന കത്ത് പ്രകാരം, എത്രയും പെട്ടെന്ന് സ്ഥലംമാറ്റം ലഭിച്ച വയനാട് ജില്ലാ ക്രൈംബ്രാഞ്ചില്‍ റിപ്പോര്‍ട്ട് ചെയ്യാനും ഉത്തരവ് നടപ്പിലാക്കാനും ആവശ്യപ്പെട്ടിരുന്നു. എന്നാല്‍ ഉദ്യോഗസ്ഥന് ഈ ഉത്തരവുകളെല്ലാം കാറ്റില്‍പ്പറത്തുകയും പുതിയ സ്റ്റേഷനില്‍ ജോലിക്കായി ഹാജരാകാതിരിക്കുകയും ചെയ്തു. ഈ വിഷയത്തില്‍ ഉദ്യോഗസ്ഥന് അഡ്മിനിസ്ട്രേറ്റീവ് ട്രൈബ്യൂണലില്‍ ഭേദഗതി വരുത്തിയ അപേക്ഷ ഫയല്‍ ചെയ്തിട്ടുണ്ടെങ്കിലും, സ്ഥലംമാറ്റ ഉത്തരവ് സ്റ്റേ ചെയ്തുകൊണ്ടുള്ള യാതൊരുവിധ ഇടക്കാല ഉത്തരവുകളും ട്രൈബ്യൂണലിന്റെ ഭാഗത്തുനിന്നും ഉണ്ടായിട്ടില്ലെന്ന് സര്‍ക്കാര്‍ പരിശോധനയില്‍ വ്യക്തമായിട്ടുണ്ട്.
അതുകൊണ്ടുതന്നെ സ്ഥലംമാറ്റ ഉത്തരവ് നിയമപരമായി നിലനില്‍ക്കുന്നുണ്ടെന്ന് സര്‍ക്കാര്‍ വ്യക്തമാക്കുന്നു. സര്‍ക്കാര്‍ ഉത്തരവുകള്‍, അപ്പീല്‍ തള്ളിയ നടപടി, അവധി അപേക്ഷകള്‍ നിരസിച്ചത്, പൊലീസ് ആസ്ഥാനത്തിന്റെ നിര്‍ദ്ദേശങ്ങള്‍ എന്നിവയെല്ലാം നിലനില്‍ക്കെ ഉദ്യോഗസ്ഥന് തുടര്‍ച്ചയായി ജോലിയില്‍ നിന്നും വിട്ടുനില്‍ക്കുന്നത് ഗുരുതരമായ ചട്ടലംഘനമാണെന്ന് സര്‍ക്കാര്‍ വിലയിരുത്തി. ഒരു പൊലീസ് ഉദ്യോഗസ്ഥനില്‍ നിന്നും ഉണ്ടാകേണ്ട അച്ചടക്കവും സേനയോടുള്ള കൂറും അനുസരണയും കാത്തുസൂക്ഷിക്കുന്നതില്‍ അദ്ദേഹം പരാജയപ്പെട്ടുവെന്ന് സര്‍ക്കാര്‍ ചൂണ്ടിക്കാണിക്കുന്നു.
ഈ സാഹചര്യത്തിലാണ് കേരള പൊലീസ് ഡിപ്പാര്‍ട്ട്മെന്റല്‍ എന്‍ക്വയറീസ്, പണിഷ്മെന്റ് ആന്റ് അപ്പീല്‍ റൂള്‍സ് 1958 ലെ റൂള്‍ 6 പ്രകാരം ഡിവൈഎസ്പി പൃഥ്വിരാജിനെതിരെ ഔദ്യോഗികമായി 'ഓറല്‍ എന്‍ക്വയറി' നടത്താന്‍ സര്‍ക്കാര്‍ ഉത്തരവിട്ടിരിക്കുന്നത്. അദ്ദേഹത്തിന്റെ ഭാഗത്തുനിന്നുണ്ടായ ഗുരുതര വീഴ്ചകളെയും നിയമലംഘനങ്ങളെയും കുറിച്ച്‌ സമഗ്രമായ അന്വേഷണത്തിനാണ് ഉത്തരവിട്ടിരിക്കുന്നത്.
