ഡല്‍ഹി: പ്രതിഷേധം വിലക്കിയ ജന്തർമന്തറില്‍ ഇന്ന് രാവിലെ സിജെപി നേതാക്കളുടെ മിന്നല്‍ പ്രതിഷേധം. സിജെപി സഹകണ്‍വീനർ സൗരവ് ദാസ്, വക്താവ് അശുതോഷ് റങ്ക, നേതാവ് അജിങ്ക്യ ഷിൻഡെ ഉള്‍പ്പെടെ ഏതാനും സിജെപി പ്രവർത്തകരും ഇന്ന് രാവിലെയോടെ ജന്തർമന്തറില്‍ എത്തിയിരുന്നു.
പ്രതിഷേധക്കാർ പൊലീസിൻ്റെ കണ്ണുവെട്ടിച്ച്‌ ഗേറ്റ് ചാടിക്കടന്ന് ജന്തർമന്തറില്‍ പ്രവേശിച്ച ശേഷം ദേശീയ പതാക ഉയർത്തി മുദ്രാവാക്യം വിളിച്ച്‌ പ്രതിഷേധിക്കുകയായിരുന്നു. ഇതിന് പിന്നാലെ പ്രതിഷേധക്കാരെ പൊലീസ് കസ്റ്റഡിയിലെടുത്തു.
വോട്ട് ചോരി ആരോപണങ്ങള്‍ക്ക് പിന്നാലെ ചീഫ് ഇലക്ഷൻ കമ്മീഷണർ ഗ്യാനേഷ് കുമാറിൻ്റെ രാജി ആവശ്യപ്പെട്ടാണ് സിജെപി നേതാക്കള്‍ ജന്തർമന്തറിലെത്തിയത്. ത്രിവർണ പതാകയും കയ്യിലേന്തിയാണ് സിജെപി നേതാക്കള്‍ ജന്തർമന്തറിലെത്തിയത്. "ഗ്യാനേഷ് കുമാർ രാജിവയ്ക്കണം, നിങ്ങള്‍ക്ക് രാജിവച്ചേ മതിയാകൂ," എന്നീ മുദ്രാവാക്യങ്ങളാണ് ഉയർത്തിയത്.
പ്രധാനമന്ത്രി നരേന്ദ്ര മോദിക്ക് പ്രതിഷേധങ്ങളെ ഡീ നോട്ടിഫൈ ചെയ്യാനാകില്ലെന്ന് അഭിജീത് ദിപ്കെ പ്രതിഷേധ വീഡിയോ പങ്കുവച്ചുകൊണ്ട് എക്സ് പോസ്റ്റില്‍ കുറിച്ചു.
അതേസമയം, ഡല്‍ഹിയിലെ കേന്ദ്രസേനാ വിന്യാസം ഏഴ് ദിവസത്തേക്ക് കൂടി നീട്ടി. കേന്ദ്ര ആഭ്യന്തര മന്ത്രാലയമാണ് ഇതു സംബന്ധിച്ച ഉത്തരവ് പുറത്തിറക്കിയത്. ഡല്‍ഹിയിലെ നിരോധനാജ്ഞ ഈ മാസം 20 വരെ നീട്ടിയിട്ടുണ്ട്. ഒക്ടോബർ 20 വരെ കേന്ദ്രസേനാ വിന്യാസത്തില്‍ കുറവ് വരുത്തേണ്ട എന്ന തീരുമാനത്തിലാണ് കേന്ദ്ര ആഭ്യന്തര മന്ത്രാലയം.
