തിരുവനന്തപുരം: എഴുപതാം കേരളപ്പിറവി ദിനാഘോഷത്തോടനുബന്ധിച്ച് ഡോ. എ.പി.ജെ. അബ്ദുൽ കലാം സ്റ്റഡി സെന്റർ ഏർപ്പെടുത്തിയ 2026-ലെ കേരളീയം പുരസ്കാരത്തിന് പ്രമുഖ ലൈഫ് ആൻഡ് കോർപ്പറേറ്റ് കോച്ചും ബോൾഡ് മൈൻഡ്സ് ഫൗണ്ടേഷൻ സ്ഥാപകനുമായ ഡോ. പ്രേംലാൽ പി.പി. അർഹനായി.
മികച്ച സാമൂഹിക പരിവർത്തകൻ, മെന്റർ എന്നീ നിലകളിലുള്ള സമഗ്ര സംഭാവനകൾ പരിഗണിച്ചാണ് പുരസ്കാരം.
നവംബർ 1 ഞായറാഴ്ച വൈകുന്നേരം 4.30-ന് തിരുവനന്തപുരം വൈലോപ്പിള്ളി സംസ്കൃതി ഭവനിൽ നടക്കുന്ന ചടങ്ങിൽ ഗതാഗത വകുപ്പ് മന്ത്രി സിപി ജോൺ പുരസ്കാരം സമ്മാനിക്കും.
വിവിധ മേഖലകളിൽ വ്യക്തിമുദ്ര പതിപ്പിച്ച പ്രമുഖർക്കും ചടങ്ങിൽ പുരസ്കാരങ്ങൾ നൽകും. മികച്ച പാർലമെന്റ് അംഗത്തിനുള്ള പുരസ്കാരം കൊടിക്കുന്നിൽ സുരേഷ് എം.പി.ക്കും മികച്ച രാജ്യസഭാ അംഗത്തിനുള്ള പുരസ്കാരം ഡോ. ജോൺ ബ്രിട്ടാസ് എം.പി.ക്കും മികച്ച നിയമസഭാ സാമാജികനുള്ള പുരസ്കാരം എം. വിൻസെന്റ് എം.എൽ.എ.ക്കും സമ്മാനിക്കും.
ആത്മീയ-സാമൂഹിക സേവന രംഗത്തെ സംഭാവനകൾ പരിഗണിച്ച് ശ്രീനാരായണ ധർമ്മ സംഘം ട്രസ്റ്റ് ജനറൽ സെക്രട്ടറി സ്വാമി ശുഭാംഗാനന്ദയെയും ആദരിക്കും.
വ്യക്തിവികാസം, വിദ്യാർത്ഥി ശാക്തീകരണം, കാർഷിക സ്വയംപര്യാപ്തത, ജീവകാരുണ്യം എന്നീ മേഖലകളിലെ ശ്രദ്ധേയമായ പ്രവർത്തനങ്ങളാണ് ഡോ. പ്രേംലാലിനെ പുരസ്കാരത്തിന് അർഹനാക്കിയത്.
കുട്ടികളുടെ സമഗ്ര വ്യക്തിത്വ വികാസം ലക്ഷ്യമിട്ട് രൂപീകരിച്ച ‘മൈൻഡ്സ് ആൻഡ് മോംസ്’ ന്യൂറോ പാരന്റിങ് പ്രസ്ഥാനം, സ്കൂൾ വിദ്യാർത്ഥികൾക്കായുള്ള ‘മൈൽസ്റ്റോൺ’ മെന്ററിംഗ് പ്രോഗ്രാം, പ്രഭാത ദിനചര്യകളിലൂടെ ജീവിതവിജയം പ്രോത്സാഹിപ്പിക്കുന്ന ‘ദി ഹാപ്പിനസ് ക്ലബ്ബ്’, അന്താരാഷ്ട്ര തലത്തിലുള്ള ‘റീഡേഴ്സ് ക്ലബ്ബ്’ എന്നിവ അദ്ദേഹത്തിന്റെ നേതൃത്വത്തിൽ നടപ്പാക്കുന്ന പ്രധാന പദ്ധതികളാണ്.
വിശക്കുന്നവർക്ക് ഭക്ഷണമെത്തിക്കുന്ന ‘അന്നം പുണ്യം’, പതിനായിരക്കണക്കിന് കുടുംബങ്ങളിൽ ജൈവകൃഷി പ്രോത്സാഹിപ്പിക്കുന്ന ‘അനാമയ ഓർഗാനിക് ക്ലബ്ബ്’, ‘ഹരിതം പുണ്യം’, ഒരു കോടി മരങ്ങൾ നട്ടുപിടിപ്പിക്കുക എന്ന ലക്ഷ്യത്തോടെ മുന്നേറുന്ന ‘മൈ ട്രീ മൈ ബ്രീത്ത്’ തുടങ്ങിയ ജീവകാരുണ്യ-പരിസ്ഥിതി സംരംഭങ്ങളും അദ്ദേഹത്തിന്റെ പ്രവർത്തനങ്ങളുടെ ഭാഗമാണ്.
സാമൂഹിക ഉത്തരവാദിത്വം, മാനവികത, പരിസ്ഥിതി സംരക്ഷണം, യുവതലമുറയുടെ ശാക്തീകരണം എന്നിവയെ ഏകോപിപ്പിച്ചുള്ള ഡോ. പ്രേംലാലിന്റെ പ്രവർത്തനങ്ങൾ സമൂഹത്തിൽ മാതൃകാപരമായ മാറ്റങ്ങൾ സൃഷ്ടിക്കുന്നതാണെന്ന് പുരസ്കാര നിർണയം വിലയിരുത്തുന്നു.
