തിരുവനന്തപുരം: വീട്ടുമുറ്റത്ത് എത്തിയ മൂർഖൻ പാമ്പിനെ കീഴ്പ്പെടുത്തിയ വളർത്തുനായ, ഏറ്റുമുട്ടലിനിടെ പാമ്പിൻ്റെ കടിയേറ്റ് ചത്തു.
വട്ടിയൂർക്കാവ് വയലിക്കട അദ്വൈതം വീട്ടില് അരുണിൻ്റെയും നിഖിതയുടെയും വളർത്തുനായ ലിയോ (ജർമൻ ഷെപ്പേർഡ്) ആണ് ചത്തത്. ഇന്നലെ ഉച്ചയോടെയായിരുന്നു സംഭവം. വീടിന് സമീപത്തായി ഉണ്ടായിരുന്ന ചാക്കുകെട്ടിന് അടുത്തായിരുന്നു പാമ്പ് ഉണ്ടായിരുന്നത്. മണം പിടിച്ച് പാമ്പിനെ കണ്ടെത്തിയ നായ അരമണിക്കൂറിലധികം പാമ്പുമായി ഏറ്റുമുട്ടി.
ഇതിന് പിന്നാലെ പാമ്പ് ചത്തു. ഇതിന് ശേഷവും വീട്ടുമുറ്റത്ത് നായ കളിച്ചുനടന്നിരുന്നു. എന്നാല് അധികം വയ്യാതെ അവശനിലയിലായി. തുടർന്ന് തിരുവനന്തപുരം പിഎംജിയിലെ വെറ്ററിനറി ആശുപത്രിയിലെത്തിച്ച് നടത്തിയ പരിശോധനയിലാണ് നായക്ക് പാമ്പിൻ്റെ കടിയേറ്റിരുന്നുവെന്ന് മനസിലായത്. ഏറ്റുമുട്ടലിനിടെ നാക്കിലാണ് കടിയേറ്റതെന്ന് പരിശോധനയില് വ്യക്തമായി.
ആൻ്റിവെനം മൂന്ന് തവണ കുത്തിവെച്ചെങ്കിലും ജീവൻ രക്ഷിക്കാനായില്ല. തുടർന്ന് വീട്ടില് കൂടിന് അടുത്തായി നായയുടെ ജഡം സംസ്കരിച്ചു.
