കോട്ടയം: കടല്‍ക്കാറ്റും തിരമാലകളുടെ സൗന്ദര്യവും ആസ്വദിച്ച്‌ ആഡംബര കപ്പലില്‍ സംഗീതത്തിന്റെയും വിനോദങ്ങളുടെയും അകമ്പടിയോടെ ഒരു സായാഹ്നം ചെലവഴിക്കാം.
യാത്രാപ്രേമികള്‍ക്കായി കെ.എസ്.ആർ.ടി.സി ബജറ്റ് ടൂറിസം സെല്‍ കോട്ടയം യൂണിറ്റാണ് കൊച്ചിയില്‍ നിന്നുള്ള നെഫർറ്റിറ്റി ആഡംബര ക്രൂയിസ് യാത്ര ഒരുക്കുന്നത്. നവംബർ 5ന് സംഘടിപ്പിക്കുന്ന യാത്രയില്‍ പരിമിതമായ സീറ്റുകളാണ് ലഭ്യമാകുക.
അന്നേ ദിവസം ഉച്ചയ്ക്ക് 12 മണിയോടെ 40 യാത്രക്കാരുമായി കെ.എസ്.ആർ.ടി.സി ബസ് കോട്ടയത്തുനിന്ന് കൊച്ചിയിലേക്ക് പുറപ്പെടും. വൈകിട്ട് നാലു മണി മുതല്‍ രാത്രി 8.30 വരെ ഏകദേശം നാലര മണിക്കൂറാണ് നെഫർറ്റിറ്റി കപ്പലില്‍ കടല്‍യാത്ര.
ആഡംബര കപ്പലിലെ വിവിധ സൗകര്യങ്ങള്‍ ആസ്വദിക്കാനും കുടുംബാംഗങ്ങള്‍ക്കും സുഹൃത്തുക്കള്‍ക്കുമൊപ്പം ആഘോഷനിമിഷങ്ങള്‍ പങ്കിടാനും യാത്ര അവസരമൊരുക്കും.
തത്സമയ സംഗീത പരിപാടികള്‍, രസകരമായ ഗെയിമുകള്‍, സംഗീതവും നൃത്തവും നിറഞ്ഞ അപ്പർ ഡെക്കിലെ ഡിജെ വിനോദങ്ങള്‍, വിഷ്വല്‍ ഇഫക്റ്റുകള്‍ എന്നിവയാണ് യാത്രയിലെ പ്രധാന ആകർഷണങ്ങള്‍. ഇതിനു പുറമേ വിഭവസമൃദ്ധമായ ബുഫെ ഡിന്നറും കുട്ടികള്‍ക്കായി പ്രത്യേകം കളിസ്ഥലവും കപ്പലിലുണ്ട്. തിയേറ്റർ ഉള്‍പ്പെടെയുള്ള ആധുനിക സൗകര്യങ്ങളും യാത്രക്കാർക്ക് അനുഭവിക്കാം.
മുതിർന്നവർക്ക് 2,780 രൂപയും അഞ്ചു മുതല്‍ 10 വയസ്സുവരെയുള്ള കുട്ടികള്‍ക്ക് 1,180 രൂപയുമാണ് ടിക്കറ്റ് നിരക്ക്. യാത്രയില്‍ പങ്കെടുക്കാൻ താല്‍പര്യമുള്ളവർക്ക് മുൻകൂട്ടി സീറ്റുകള്‍ ബുക്ക് ചെയ്യാം.
ബുക്കിങ്ങിനും കൂടുതല്‍ വിവരങ്ങള്‍ക്കും ബന്ധപ്പെടുക:
9447564109, 9207379008
