കോവളത്ത് 16-കാരിയെ സ്പാകളിൽ പീഡിപ്പിച്ച സംഭവം; വ്യാജ ആധാർ കാർഡുകൾ കണ്ടെത്തി, സ്പാ ഉടമകൾ അറസ്റ്റിൽ!

തിരുവനന്തപുരം: കോവളത്തെ വിവിധ സ്പാകൾ കേന്ദ്രീകരിച്ച് ആന്ധ്രാ സ്വദേശിനിയായ പതിനാറുകാരിയെ ക്രൂരമായ ലൈംഗിക പീഡനത്തിന് ഇരയാക്കിയ സംഭവത്തിൽ അന്വേഷണത്തിനായി സൈബർ വിദഗ്ദ്ധർ ഉൾപ്പെടുന്ന പ്രത്യേക അന്വേഷണ സംഘത്തെ രൂപീകരിച്ചു. മാതാപിതാക്കൾ നഷ്ടപ്പെട്ട പെൺകുട്ടിയെ ജോലിക്കെന്ന പേരിൽ കോവളത്ത് എത്തിച്ച് ആയുർകേരള, ഡാലിയ ഹോം, കേരള ആയുർവേദ എന്നീ സ്പാകളിൽ നിർത്തി കഴിഞ്ഞ ഒരു വർഷത്തോളമായി പീഡിപ്പിക്കുകയായിരുന്നുവെന്നാണ് പൊലീസിന്റെ കണ്ടെത്തൽ. പീഡനം സഹിക്കാനാകാതെ പെൺകുട്ടി ഒരു മലയാളി ജീവനക്കാരനൊപ്പം രക്ഷപ്പെട്ടതോടെ ഇളയമ്മ പൊലീസിൽ പരാതി നൽകുകയും, തുടർന്ന് നടത്തിയ കൗൺസിലിംഗിലാണ് ചെന്നൈയിലും മുംബൈയിലും ഉൾപ്പെടെ നടന്ന ക്രമക്കേടുകളുടെ ഞെട്ടിക്കുന്ന വിവരങ്ങൾ പുറത്തുവന്നത്. പെൺകുട്ടിയുടെ പ്രായം മറച്ചുവെക്കാൻ 16 വയസ്സും 20 വയസ്സും രേഖപ്പെടുത്തിയ രണ്ട് വ്യാജ ആധാർ കാർഡുകൾ നിർമ്മിച്ചതായും, കുട്ടിയുടെ യഥാർത്ഥ പ്രായം 16 ആണെന്ന് സ്ഥിരീകരിച്ചതായും പൊലീസ് വ്യക്തമാക്കി. കേസിൽ സ്പാ നടത്തിപ്പുകാരായ സജിത് കുമാർ, നിഷാന്ത് എന്നിവരെ പൊലീസ് നേരത്തെ അറസ്റ്റ് ചെയ്തിട്ടുണ്ട്. പ്രതികളുടെ ഐഡന്റിഫിക്കേഷൻ പരേഡ് നടത്താനും സ്പായിൽ എത്തിയിരുന്ന സന്ദർശകരുടെ വിവരങ്ങൾ ശേഖരിക്കാനും സൈബർ സംഘം അന്വേഷണം ഊർജ്ജിതമാക്കിയിട്ടുണ്ട്.