ആലപ്പുഴ: ആശുപത്രി പരിസരങ്ങളിലെ സൗജന്യ ഭക്ഷണ വിതരണം കമ്മ്യൂണിറ്റി കിച്ചൻ സംവിധാനത്തിലേക്ക് മാറ്റാൻ ആരോഗ്യവകുപ്പ്. പദ്ധതിക്ക് ആലപ്പുഴ മെഡിക്കൽ കോളേജിൽ തുടക്കമിടുമെന്ന് ആരോഗ്യമന്ത്രി കെ. മുരളീധരൻ വാർത്താസമ്മേളനത്തിൽ അറിയിച്ചു.
ബാനറുകളും കൊടികളും സ്ഥാപിച്ച് ആശുപത്രി പരിസരത്ത് ഭക്ഷണം വിതരണം ചെയ്യാൻ അനുവദിക്കില്ലെന്ന് മന്ത്രി വ്യക്തമാക്കി. എന്നാൽ കമ്മ്യൂണിറ്റി കിച്ചൻ എന്ന നിലയിൽ ഭക്ഷണം നൽകുന്നതിന് തടസമില്ലെന്നും അദ്ദേഹം പറഞ്ഞു.
പൊതിച്ചോറ് വിതരണവുമായി ബന്ധപ്പെട്ട് ജി. സുധാകരൻ കഴിഞ്ഞ ദിവസം നടത്തിയ പ്രസ്താവനയ്ക്ക് പിന്നാലെയാണ് കമ്മ്യൂണിറ്റി കിച്ചൻ ആരംഭിക്കുമെന്ന മന്ത്രിയുടെ പ്രഖ്യാപനം. ആശുപത്രികളിലെ ഡിവൈഎഫ്ഐയുടെ പൊതിച്ചോറ് വിതരണത്തിനെതിരായ നീക്കമാണിതെന്ന തരത്തിൽ പ്രഖ്യാപനത്തിന് രാഷ്ട്രീയ വ്യാഖ്യാനങ്ങളും ഉയരുന്നുണ്ട്.
പൊതിച്ചോറ് വിതരണത്തെ വിമർശിച്ച് രംഗത്തെത്തിയ ജി. സുധാകരൻ പിന്നീട് തന്റെ പരാമർശം മയപ്പെടുത്തിയിരുന്നു.
