തിരുവനന്തപുരം: സംസ്ഥാനത്ത് പാവപ്പെട്ടവരുടെ ക്ഷേമ പെന്ഷന് മുടങ്ങാതിരിക്കാന് അര്ഹരായവര് അക്ഷയ കേന്ദ്രങ്ങള്ക്ക് മുന്നില് മണിക്കൂറുകളോളം ക്യൂ നില്ക്കുമ്പോള്, നിയമസഭാ സെക്രട്ടേറിയറ്റില് മുന് എം.എല്.എമാര്ക്കും അവരുടെ ആശ്രിതര്ക്കുമുള്ള പെന്ഷന് വിതരണത്തില് വന് ക്രമക്കേടെന്ന് ആക്ഷേപം.
വിവരാവകാശ നിയമപ്രകാരം നിയമസഭാ സെക്രട്ടേറിയറ്റില് നിന്നും ലഭിച്ച ഔദ്യോഗിക ഗുണഭോക്തൃ പട്ടിക പരിശോധിച്ചപ്പോഴാണ് മരിച്ചവരുടെ പേരിലും, ഒരേ ആള്ക്ക് തന്നെ ഇരട്ട പെന്ഷനായും, നിലവില് നിയമസഭാംഗങ്ങളായി തുടരുന്നവര്ക്ക് വരെ പെന്ഷന് നല്കുന്നതായുള്ള ഞെട്ടിക്കുന്ന വിവരങ്ങള് പുറത്തുവന്നത്. ലക്ഷങ്ങള് ശമ്പളവും മറ്റ് ആനുകൂല്യങ്ങളും പറ്റുന്നവരുടെ കാര്യത്തില് നിയമസഭാ സെക്രട്ടേറിയറ്റ് കാട്ടുന്ന ഈ ഗുരുതരമായ അനാസ്ഥയില് സമഗ്രമായ അന്വേഷണം വേണമെന്ന ആവശ്യം ഇതിനകം ശക്തമായിട്ടുണ്ട്.
ഔദ്യോഗിക വിവരങ്ങള് അനുസരിച്ച് നിലവില് 225 മുന് എം.എല്.എമാര്ക്ക് പെന്ഷനും മരണപ്പെട്ട 230 മുന് അംഗങ്ങളുടെ കുടുംബങ്ങള്ക്ക് കുടുംബ പെന്ഷനും നല്കി വരുന്നുണ്ട്. എന്നാല് ഈ ലിസ്റ്റില് കടന്നുകൂടിയ വിചിത്രവും ഞെട്ടിക്കുന്നതുമായ ക്രമക്കേടുകള് നിരവധിയാണ്.
മരിച്ചവരും ലിസ്റ്റില് സജീവം; ഒരേ വ്യക്തിക്ക് രണ്ട് പെന്ഷന്!
2021 മെയ് 11-ന് അന്തരിച്ച പ്രമുഖ നേതാവ് കെ.ആര്. ഗൗരിയമ്മ, അന്തരിച്ച മുന് എം.എല്.എ ടി.വി. തോമസിന്റെ ഭാര്യ എന്ന നിലയില് ഇപ്പോഴും കുടുംബ പെന്ഷന് ലിസ്റ്റില് തുടരുന്നുണ്ട്. 2019 ഡിസംബര് 13-ന് മരണപ്പെട്ട മുന് ദേവികുളം എം.എല്.എ എസ്. സുന്ദര മാണിക്കത്തിന് ഇപ്പോഴും പെന്ഷന് അനുവദിക്കുന്നതായി ലിസ്റ്റില് കാണാം. ഇതിലും വിചിത്രമായി, ഇതേ വ്യക്തി മരണപ്പെട്ടുവെന്ന് കാണിച്ച് അദ്ദേഹത്തിന്റെ ഭാര്യ അന്നമ്മാളിന് കുടുംബ പെന്ഷനും അനുവദിച്ചിട്ടുണ്ട്.
2023 ആഗസ്റ്റില് അന്തരിച്ച സരോജിനി ബാലാനന്ദനും (ഇ. ബാലാനന്ദന്റെ ഭാര്യ) ഇപ്പോഴും കുടുംബ പെന്ഷന് ലിസ്റ്റില് സജീവമായി ഉള്പ്പെട്ടിരിക്കുന്നു.
ആള്മാറാട്ടവും പേരുവിവരങ്ങളിലെ ദുരൂഹതകളും
മുന് എം.പി കൂടിയായ പി.കെ. ശ്രീമതി, പി.ആര്. കൃഷ്ണന് എന്ന മുന് എം.എല്.എയുടെ ഭാര്യ എന്ന രീതിയിലാണ് കുടുംബ പെന്ഷന് പട്ടികയില് ഉള്പ്പെട്ടിരിക്കുന്നത്. എന്നാല് സഭാ രേഖകളില് ഇങ്ങനെ ഒരു എം.എല്.എ ഉള്ളതായി വിവരമില്ല. മാത്രമല്ല, ശ്രീമതി ടീച്ചറുടെ ഭര്ത്താവ് ഇ. ദാമോദരന് നമ്പ്യാര് ഒരിക്കലും നിയമസഭാംഗമായിരുന്നിട്ടുമില്ല.
എം.എല്.എ ആകാത്ത ആളുടെ മകള്ക്ക് പെന്ഷന്
ഒരിക്കല് പോലും സംസ്ഥാന നിയമസഭയില് അംഗമല്ലാതിരുന്ന പ്രൊഫ. കെ.എം. ചാണ്ടിയുടെ മകള് ത്രേസിയാമ്മ ചാണ്ടിക്ക് പെന്ഷന് പട്ടികയില് എങ്ങനെ സ്ഥാനം ലഭിച്ചു എന്നത് വലിയ ദുരൂഹതയായി തുടരുന്നു.
രണ്ടു ഭാര്യമാര്ക്കും ഒരേസമയം പെന്ഷന്
മുന് തിരുവമ്പാടി എം.എല്.എ എ.വി. അബ്ദുറഹിമാന് ഹാജിയുടെ രണ്ട് ഭാര്യമാര്ക്ക് (എടവതേരി കുഞ്ഞായിഷ, ആസ്യ) ഒരേസമയം കുടുംബ പെന്ഷന് അനുവദിച്ചതായും രേഖകളില് കാണാം.
എലിസബത്ത് മാമ്മന് മത്തായിയുടെ ഇരട്ട പെന്ഷന്
മുന് തിരുവല്ല എം.എല്.എ എന്ന നിലയില് സ്വന്തം പെന്ഷന് പട്ടികയിലും, അന്തരിച്ച മുന് എം.എല്.എ മാമ്മന് മത്തായിയുടെ ഭാര്യ എന്ന നിലയില് കുടുംബ പെന്ഷന് പട്ടികയിലും എലിസബത്ത് മാമ്മന് മത്തായി ഒരേസമയം ഇടംപിടിച്ചിട്ടുണ്ട്.
എംഎല്എമാരായവര്ക്കും പെന്ഷന്
നിയമസഭാംഗമായി തുടരുന്നവര്ക്ക് മുന് എം.എല്.എ പെന്ഷന് അനുവദിക്കാറില്ലെന്നിരിക്കെ, ചേലക്കരയില് നിന്ന് വീണ്ടും തെരഞ്ഞെടുക്കപ്പെട്ട സിറ്റിംഗ് എം.എല്.എ യു.ആര്. പ്രദീപും മുന് അംഗങ്ങളുടെ പെന്ഷന് ലിസ്റ്റിലുണ്ട്. നിലവിലെ പതിനാറാം നിയമസഭയില് എം.എല്.എമാരായി വീണ്ടും തെരഞ്ഞെടുക്കപ്പെട്ട് തിരിച്ചെത്തിയ തോമസ് ഉണ്ണിയാടന്, കെ.എം. ഷാജി, ഷാനിമോള് ഉസ്മാന്, എന്. ശക്തന് എന്നിവരെ ഇനിയും പെന്ഷന് ലിസ്റ്റില് നിന്നും ഒഴിവാക്കിയിട്ടില്ല.
ഗുണഭോക്തൃ പട്ടികയില് പേജുകള് മാറിവന്നതും, ഒരേ എം.എല്.എയുടെ ഭാര്യയായി രണ്ട് വ്യത്യസ്ത പേരുകള് (ഉദാഹരണത്തിന് സി.എ. മാത്യുവിന്റെ ഭാര്യമാരായി ഏലിയാമ്മ മാത്യു, ഏലിയാമ്മ വര്ഗീസ് എന്നിങ്ങനെ 5, 6 ക്രമനമ്പറുകളില്) രേഖപ്പെടുത്തിയതും ക്രമക്കേടാണ്. കൂടാതെ, സീരിയല് നമ്പറുകള് മുങ്ങിയതും (ഉദാഹരണത്തിന് കുടുംബ പെന്ഷന് പട്ടികയില് S.No. 28 കാണാനില്ല) നിയമസഭാ സെക്രട്ടേറിയറ്റിന്റെ ഭാഗത്തുനിന്നുള്ള ഗുരുതരമായ കൃത്യവിലോപമാണ് ഇത് വ്യക്തമാക്കുന്നത്.
സാധാരണക്കാരന് ഒരു നീതി; വി.ഐ.പികള്ക്ക് മറ്റൊരു നീതി?
പാവപ്പെട്ട തൊഴിലാളികളും വൃദ്ധരും തങ്ങളുടെ തുച്ഛമായ ക്ഷേമ പെന്ഷന് മുടങ്ങാതിരിക്കാന് സെപ്റ്റംബര് 30-നകം മസ്റ്ററിങ് നടത്താന് നെട്ടോട്ടമോടുമ്പോഴാണ്, ലക്ഷങ്ങള് ശമ്പളവും മറ്റ് ആനുകൂല്യങ്ങളും പറ്റുന്ന വി.ഐ.പികളുടെ കാര്യത്തില് വകുപ്പ് ഇത്രയും വലിയ അനാസ്ഥ കാട്ടുന്നത്. മരിച്ചവരുടെ പേരിലുള്ള അക്കൗണ്ടുകളിലേക്ക് പോകുന്ന പെന്ഷന് പണം യഥാര്ത്ഥത്തില് ആരുടെ കൈകളിലേക്കാണ് എത്തുന്നതെന്ന കാര്യത്തില് സമഗ്രവും അടിയന്തരവുമായ അന്വേഷണം വേണമെന്ന ആവശ്യം പൊതുസമൂഹത്തില് ഇതിനകം ശക്തമായിട്ടുണ്ട്.
