മുമ്പ് രക്തപരിശോധനയുടെയോ സ്കാനിങ്ങിന്റെയോ ഫലം ലഭിച്ചാല്‍ അതിന്റെ അർത്ഥം മനസിലാക്കാൻ ഡോക്ടർമാരെ ആശ്രയിക്കുകയായിരുന്നു നമ്മള്‍.
എന്നാല്‍ ഇന്ന് ആർട്ടിഫിഷ്യല്‍ ഇന്റലിജൻസിന്റെ വളർച്ചയോടെ ഈ രീതിയില്‍ വലിയ മാറ്റമാണ് സംഭവിച്ചിരിക്കുന്നത്. ചാറ്റ്‌ജിപിടി പോലുള്ള എഐ ടൂളുകളുടെ സഹായത്തോടെ രക്തപരിശോധനാ ഫലങ്ങള്‍ മുതല്‍ എംആർഐ റിപ്പോർട്ടുകള്‍ വരെ മനസിലാക്കാൻ പലരും ശ്രമിക്കുന്നുണ്ട്. സങ്കീർണമായ മെഡിക്കല്‍ പദങ്ങള്‍ ലളിതമായി വിശദീകരിക്കാൻ എഐ സഹായിക്കുമെങ്കിലും, ഇത്തരം റിപ്പോർട്ടുകള്‍ വിശകലനം ചെയ്യുമ്പോള്‍ എത്രത്തോളം വിശ്വസിക്കാം? ആരോഗ്യകാര്യങ്ങളില്‍ എഐയെ ആശ്രയിക്കുന്നതിന്റെ സാധ്യതകളും പരിമിതികളും എന്തൊക്കെയാണ്? പരിശോധിക്കാം.
മെഡിക്കല്‍ പരിശോധനാ ഫലങ്ങളുടെ ചിത്രങ്ങള്‍ ചാറ്റ് ജിപിടിയില്‍ അപ്‍ലോഡ് ചെയ്താണ് ആളുകള്‍ വിവരങ്ങള്‍ മനസിലാക്കാൻ ശ്രമിക്കുന്നത്. ദില്ലിയിലെ മഹാജൻ ഇമേജിംഗ് ആൻഡ് ലാബ്സിന്റെ സ്ഥാപകനും ചെയർമാനുമായ ഡോ. ഹർഷ് മഹാജൻ ഇക്കാര്യങ്ങളെക്കുറിച്ച്‌ ഒരു ദേശീയ മാധ്യമത്തോട് സംസാരിച്ചു.ചാറ്റ് ജിപിടി ഒരു ഡോക്ടറിന് പകരമാകില്ലെന്നാണ് അദ്ദേഹം പറയുന്നത്. ഓണ്‍ലൈനില്‍ ലഭ്യമായ വിവരങ്ങളെ അടിസ്ഥാനമാക്കി മാത്രമേ എഐ ഉത്തരങ്ങള്‍ നല്‍കുന്നുള്ളൂ. ഇത് മെഡിക്കല്‍ റിപ്പോർട്ടുകള്‍ വിശദീകരിക്കുന്നു, പക്ഷേ ഒരു വ്യക്തിയുടെ മൊത്തത്തിലുള്ള രോഗമോ ആരോഗ്യമോ കൃത്യമായി വിലയിരുത്താൻ കഴിയില്ലെന്നാണ് അദ്ദേഹം പറയുന്നത്.
