ഡല്‍ഹി: സിബിഎസ്‌ഇ പന്ത്രണ്ടാംക്ലാസ് പരീക്ഷയില്‍ ഓണ്‍സ്ക്രീൻ മാർക്കിംഗ് (ഒഎസ്‌എം) മൂല്യനിർണയം ഒഴിവാക്കിയേക്കുമെന്ന് റിപ്പോർട്ട്.
സിബിഎസ്‌ഇ ജനറല്‍ ബോഡിയില്‍ ഇതുസംബന്ധിച്ച്‌ തീരുമാനം ഉണ്ടായേക്കുമെന്നാണ് അറിയുന്നത്. കഴിഞ്ഞവർഷത്തെ വ്യാപക പരാതിയുടെ പശ്ചാത്തലത്തിലാണ് ഒഎസ്‌എം ഒഴിവാക്കാൻ സിബിഎസ് നിർബന്ധിതമായത്.
ഇക്കൊല്ലംമുതല്‍ പത്താംക്ലാസിലും ഒഎസ്‌എം നടപ്പാക്കുമെന്നാണ് കഴിഞ്ഞവർഷം അധികൃതർ പറഞ്ഞിരുന്നത്. സാധാരണഗതിയില്‍ ഫെബ്രുവരിയിലാണ് പന്ത്രണ്ടാംക്ലാസ് പരീക്ഷ ആരംഭിക്കുന്നത്. പരീക്ഷ ആരംഭിക്കാൻ കഷ്ടിച്ച്‌ മൂന്നുമാസംമാത്രം ശേഷിക്കുമ്പോഴും ഒഎസ്‌എം സംബന്ധിച്ച്‌ വ്യക്തത ഇല്ലാത്തതില്‍ വിദ്യാർത്ഥികളും രക്ഷിതാക്കളും കടുത്ത ആശങ്കയിലായിരുന്നു.
ഓണ്‍സ്ക്രീൻ മാർക്കിംഗ് സംവിധാനത്തിനെതിരെ കഴിഞ്ഞവർഷം വ്യാപക പരാതികളാണ് ഉയർന്നത്. ഉത്തരക്കടലാസുകളുടെ മൂല്യനിർണയത്തില്‍ പിഴവുകള്‍ സംഭവിച്ചതായും ചില ഉത്തരക്കടലാസുകള്‍ ശരിയായ രീതിയില്‍ വിലയിരുത്തപ്പെട്ടില്ലെന്നമായിരുന്നു ആരോപണം. ആദ്യം ഇത് സിബിഎസ്‌ഇ തള്ളിക്കളഞ്ഞെങ്കിലും തെളിവുകള്‍ ഒന്നൊന്നായി പുറത്തുവന്നതോടെ ഒടുവില്‍ തെറ്റ് സമ്മതിക്കേണ്ടിവന്നു.
അതേസമയം, പരീക്ഷകളുടെ ടൈംടേബിള്‍ സിബിഎസ്‌ഇ ഇതുവരെ പ്രഖ്യാപിച്ചിട്ടില്ല. കഴിഞ്ഞ വർഷത്തെ സമയക്രമവുമായി താരതമ്യം ചെയ്യുമ്പോള്‍ ഇത്തവണ ടൈംടേബിള്‍ പ്രഖ്യാപിക്കാൻ ഏറെ വൈകിയിരിക്കുകയാണ്. കഴിഞ്ഞ വർഷത്തെ ബോർഡ് പരീക്ഷകള്‍ക്കായി താല്‍ക്കാലിക ടൈംടേബിള്‍ സിബിഎസ്‌ഇ പ്രസിദ്ധീകരിച്ചത് 2025 സെപ്തംബർ 24നാണ്. തുടർന്ന് അന്തിമ ടൈംടേബിള്‍ 2025 ഒക്ടോബർ 30ന് പ്രസിദ്ധീകരിച്ചു.
പരീക്ഷകള്‍ ആരംഭിക്കുന്നതിന് 146 ദിവസം മുമ്പാണ് കഴിഞ്ഞ വർഷം താല്‍ക്കാലിക സമയക്രമം പ്രസിദ്ധീകരിച്ചത്. ഇതിലൂടെ വിദ്യാർത്ഥികള്‍ക്കും സ്കൂളുകള്‍ക്കും പരീക്ഷയ്ക്കുള്ള തയ്യാറെടുപ്പുകള്‍ നേരത്തേ ആസൂത്രണം ചെയ്യാൻ സാധിച്ചിരുന്നു. അടുത്തയാഴ്ചയോടെ ടൈംടേബിള്‍ പുറത്തുവരും എന്നാണ് ഇപ്പോള്‍ അറിയുന്നത്.
