ടെക്‌സാസ്: പ്രശസ്ത അമേരിക്കന്‍ നടന്‍ ആര്‍ജെ മിറ്റി അന്തരിച്ചു. 34 വയസായിരുന്നു. ലോകമെമ്പാടും ലക്ഷക്കണക്കിന് ആരാധകരുള്ള ടി വി സീരിസ് ബ്രേക്കിങ് ബാഡിലെ സുപ്രധാന വേഷം കൈകാര്യം ചെയ്ത താരമാണ് മിറ്റി.
വീടിനുള്ളില്‍ മരിച്ച നിലയില്‍ കണ്ടെത്തുകയായിരുന്നു. മരണ കാരണം വ്യക്തമല്ല.
അധോലോകത്തെ മയക്കുമരുന്ന് രാജാവായി മാറിയ കെമിസ്ട്രി അധ്യാപകന്‍ വാള്‍ട്ടര്‍ വൈറ്റിന്റെ മൂത്ത മകനായ വാള്‍ട്ടര്‍ വൈറ്റ് ജൂനിയറായാണ് മിറ്റി ബ്രേക്കിംഗ് ബാഡില്‍ വേഷമിട്ടത്. പൊതുവിടങ്ങള്‍ ഭിന്നശേഷി സൗഹൃദമാകേണ്ടതിന്റെ ആവശ്യകതയും ലോകം അവരെ ഉള്‍ക്കൊള്ളേണ്ടതിന്റെ നീതിയും തുടങ്ങിയ കാര്യങ്ങള്‍ ഈ കഥാപാത്രം മൂലം ചര്‍ച്ച ചെയ്യപ്പെട്ടിരുന്നു. സെറിബ്രല്‍ പാള്‍സി ബാധിതനായിരുന്ന മിറ്റി, ഭിന്നശേഷിക്കാരേയും ശാരീരിക പരിമിതികളേയും കുറിച്ചുള്ള പൊതുബോധത്തെ മാറ്റിത്തീര്‍ക്കാനായി 'ദി മിറ്റി ഫൗണ്ടേഷന്‍'എന്ന പേരില്‍ ഒരു സംഘടനയും രൂപീകരിച്ചിരുന്നു. ലാഭേച്ഛയില്ലാത്ത ആശുപത്രി ശൃംഖലയായ ഷ്രൈനേഴ്സ് ചില്‍ഡ്രന്‍സിന്റെ യുണൈറ്റഡ് സെറിബ്രല്‍ പാള്‍സി അംബാസിഡറായും അദ്ദേഹം പ്രവര്‍ത്തിച്ചു.നടനെന്നതിനുപരി സെറിബ്രല്‍ പാള്‍സിയ്‌ക്കൊപ്പം ജീവിക്കുന്ന ലക്ഷക്കണക്കിന് പേര്‍ക്ക് ആത്മവിശ്വാസം പകരുന്ന വ്യക്തിത്വം കൂടിയായിരുന്നു മിറ്റി.
തന്റെ സഹതാരം എന്നതിനേക്കാള്‍ തന്റെ ഓമനപുത്രനായി കാണുന്ന മിറ്റിയെ എന്നെന്നും മിസ് ചെയ്യുമെന്ന് ബ്രേക്കിംഗ് ബാഡിലെ കേന്ദ്രകഥാപാത്രമായ വാള്‍ട്ടല്‍ വൈറ്റിനെ അവതരിപ്പിച്ച ബ്രയാന്‍ ക്രാന്‍സ്റ്റണ്‍ സോഷ്യല്‍ മീഡിയയില്‍ കുറിച്ചു. 'എന്റെ ഓമന പുത്രന്‍ വിടവാങ്ങി, സെറിബ്രല്‍ പാള്‍സി എന്ന വെല്ലുവിളി ഒന്നിലും അവന്‍ ഒരു എക്‌സ്‌ക്യൂസ് ആക്കിയിട്ടില്ല, നിന്നെ ഒരുപാട് മിസ്സ് ചെയ്യുന്നു മകനേ' എന്നാണ് അദ്ദേഹത്തിന്റെ കുറിപ്പ്. ഈ വാര്‍ത്ത ഹൃദയഭേദകമെന്ന് സീരിസില്‍ മിറ്റിയുടെ അമ്മാവനായി അഭിനയിച്ച ഡിയാന്‍ നോറിസും പോസ്റ്റ് ചെയ്തു.
