ബംഗളുരു: ശബരിമല സ്വര്ണക്കൊള്ള കേസിലെ ഒന്നാം പ്രതി ഉണ്ണിക്കൃഷ്ണന് പോറ്റിക്ക് ബെംഗളൂരുവിലെ ശ്രീരാമപുര അയ്യപ്പക്ഷേത്രത്തില് വച്ച് ഗംഭീര സ്വീകരണം നല്കിയത് വന് വിവാദത്തില്.
13 വര്ഷമായി പോറ്റി താമസിക്കുന്ന ഫ്ലാറ്റിന് സമീപത്തുള്ള ഈ ക്ഷേത്രത്തില് ഇന്ന് രാവിലെയോടെയാണ് ഇയാള് എത്തിയത്. ക്ഷേത്രത്തിലെത്തി തേങ്ങയുടച്ച് തൊഴുത് പുറത്തിറങ്ങിയ പോറ്റിയെ സുഹൃത്തുക്കള് ശരണംവിളികളോടെ മാലയിട്ട് സ്വീകരിക്കുകയായിരുന്നു. നേരത്തെ പന്ത്രണ്ട് വര്ഷത്തിലേറെ ഈ ക്ഷേത്രത്തില് കീഴ്ശാന്തിയായി പ്രവര്ത്തിച്ചിരുന്ന വ്യക്തികൂടിയാണ് ഉണ്ണിക്കൃഷ്ണന് പോറ്റി.
കോടതി ജാമ്യവ്യവസ്ഥയില് ഇളവ് അനുവദിച്ചതിനെ തുടര്ന്നാണ് ഉണ്ണിക്കൃഷ്ണന് പോറ്റി ബെംഗളൂരുവിലെ ക്ഷേത്രത്തിലെത്തിയത്. വിവിധ പൂജാകര്മ്മങ്ങളില് പങ്കെടുക്കുന്നതിനായി 20 ദിവസത്തെ ഇളവാണ് കോടതി ഇയാള്ക്ക് അനുവദിച്ചിരുന്നത്. സുഹൃത്തായ രമേഷ് റാവുവിന്റെ വീട്ടില് പൂജ നടത്തുന്നതിനടക്കമുള്ള ആവശ്യങ്ങള് ചൂണ്ടിക്കാണിച്ചാണ് പോറ്റി കോടതിയെ സമീപിച്ച് ജാമ്യവ്യവസ്ഥയില് ഇളവ് നേടിയെടുത്തത്. ഈ ഇളവ് ലഭിച്ചതിന് പിന്നാലെയാണ് പോറ്റി ബെംഗളൂരുവിലേക്ക് എത്തിയതും സുഹൃത്തുക്കളുടെ നേതൃത്വത്തില് സ്വീകരണം സംഘടിപ്പിച്ചതും.
അതേസമയം, ഉണ്ണിക്കൃഷ്ണന് പോറ്റിക്ക് നല്കിയ സ്വീകരണവുമായി ക്ഷേത്ര ഭരണസമിതിക്ക് യാതൊരു ബന്ധവുമില്ലെന്ന് ഭാരവാഹികള് വ്യക്തമാക്കി. സ്വീകരണ ചടങ്ങിനായി സംഘാടകര് ക്ഷേത്ര അധികൃതരില് നിന്ന് അനുമതി വാങ്ങിയിരുന്നില്ലെന്ന് ക്ഷേത്രം മാനേജര് ശിവന്കുട്ടി പറഞ്ഞു. മേല്ശാന്തി വിവരം അറിയിച്ചപ്പോള് മാത്രമാണ് സംഭവം ക്ഷേത്രക്കമ്മിറ്റി അറിയുന്നത്. അതേസമയം, മാധ്യമങ്ങളോട് പ്രതികരിക്കാന് ഉണ്ണിക്കൃഷ്ണന് പോറ്റിയും ഇതുവരെ തയ്യാറായിട്ടില്ല.
പോറ്റിയുടെ സുഹൃത്തായ രമേഷ് റാവുവിന്റെ നേതൃത്വത്തിലാണ് ഈ സ്വീകരണ പരിപാടി മുഴുവന് ആസൂത്രണം ചെയ്തത്. ജാമ്യവ്യവസ്ഥയില് ഇളവ് ലഭിക്കുന്നതിനായുള്ള നിയമനടപടികളില് പോറ്റിയെ സഹായിച്ചതും രമേഷ് റാവുവായിരുന്നു. നേരത്തെ ശബരിമലയില് നിന്ന് ദ്വാരപാളികളും വാതില്പാളികളും ഏറ്റുവാങ്ങിയ സംഘത്തിന് നേതൃത്വം നല്കിയതും രമേഷ് റാവു ആയിരുന്നുവെന്ന വിവരങ്ങളും പുറത്തുവരുന്നുണ്ട്.
ശബരിമലയിലെ സ്വര്ണക്കൊള്ളയുമായി ബന്ധപ്പെട്ട് വന് ക്രമക്കേടുകളാണ് പ്രത്യേക അന്വേഷണ സംഘം (എസ്.ഐ.ടി) കണ്ടെത്തിയിട്ടുള്ളത്. 2019 ജൂണിലും ഓഗസ്റ്റിലുമായി 21 പാളികള് ചെന്നൈയിലെ സ്മാര്ട്ട് ക്രിയേഷന്സില് എത്തിച്ചുവെന്നാണ് അന്വേഷണ സംഘത്തിന്റെ വിലയിരുത്തല്. ഇതില് തന്നെ ചില വ്യക്തത ഇന്നലത്തെ ചോദ്യം ചെയ്യലില് അന്വേഷണ സംഘം ഉറപ്പിച്ചിട്ടുണ്ട്. 2019 ല് പാളികള് സ്മാര്ട്ട് ക്രിയേഷന്സില് എത്തിച്ചു സ്വര്ണ്ണം വേര്തിരിച്ചെടുത്തു, 474.99 ഗ്രാം സ്വര്ണ്ണം ഉണ്ണികൃഷ്ണന് പോറ്റി തട്ടിയെടുത്തു എന്ന് SIT ഉറപ്പിക്കുന്നുണ്ട്.109 ഗ്രാം സ്വര്ണ്ണം സ്മാര്ട്ട് ക്രിയേഷന്സും കൂലിയായി എടുത്തു.സ്വര്ണ്ണപ്പാളികള് സ്വന്തം ചിലവില് സ്വര്ണ്ണം പൂശുമെന്ന ഉറപ്പിന് വിരുദ്ധമായി പലരില് നിന്നും സ്വര്ണ്ണവും പണവും ഉണ്ണികൃഷ്ണന് പോറ്റി കൈപ്പറ്റിയെന്നും, നിയമവിരുദ്ധമായി പ്രദര്ശിപ്പിച്ചു ലാഭമുണ്ടാക്കിയെന്നും SIT ക്ക് തെളിവ് ലഭിച്ചിട്ടുണ്ട്.
സ്വര്ണപ്പാളികള് നിയമവിരുദ്ധമായി പലയിടങ്ങളിലും പ്രദര്ശിപ്പിച്ച് ഇയാള് സാമ്പത്തിക ലാഭമുണ്ടാക്കിയതിനും പോലീസിന് വ്യക്തമായ തെളിവുകള് ലഭിച്ചിട്ടുണ്ട്. കേസില് അന്വേഷണം പുരോഗമിക്കുന്നതിനിടെ പ്രതിക്ക് ലഭിച്ച പരസ്യസ്വീകരണം വലിയ രീതിയിലുള്ള പ്രതിഷേധങ്ങള്ക്കാണ് വഴിതുറന്നിരിക്കുന്നത്.
