കൊച്ചി: നെടുമ്പാശേരി മിനി കൂപ്പർ അപകടത്തിലെ പ്രധാന പ്രതി സുഹൈല്‍ സജീവ് മുടി പറ്റെവെട്ടിയത് സാക്ഷികളെ കുഴക്കി കേസില്‍ നിന്ന് രക്ഷപ്പെടാനുള്ള തന്ത്രത്തിന്റെ ഭാഗമെന്ന ആക്ഷേപം ശക്തം.
അധികൃതരുടെ ഒത്താശ ഇതിനുണ്ടാവാം എന്നും ആക്ഷേപമുണ്ട്. ഇന്നലെ കോടതിയില്‍ ഹാജരാക്കിയപ്പോഴാണ് സുഹൈല്‍ മുടി പറ്റെവെട്ടിയത് പുറംലോകം അറിഞ്ഞത്. കേസില്‍ അറസ്റ്റിലായ മറ്റുള്ളവരും ഏറക്കുറെ മുടി പറ്റെവെട്ടിയിരുന്നു.
മുടി മുറിച്ച സുഹൈലിനെ ഒറ്റനോട്ടത്തിലെന്നല്ല സൂക്ഷിച്ചുനോക്കിയാല്‍പ്പോലും ആർക്കും മനസിലാവില്ല. കേസില്‍ അറസ്റ്റിലാകുമ്പോള്‍ മാദ്ധ്യമങ്ങളിലൂടെ പുറത്തുവന്ന രൂപവുമായി ഒരു സാമ്യവുമുണ്ടായിരുന്നില്ല. ഇത്തരത്തിലുളള രൂപമാറ്റവുമായി എത്തിയാല്‍ തിരിച്ചറിയല്‍ പരേഡില്‍ സുഹൈലിനെ തിരിച്ചറിയാൻ സാക്ഷികള്‍ ബുദ്ധിമുട്ടും. അതിനുവേണ്ടി ബന്ധപ്പെട്ടവരുടെ ഒത്താശയോടെ നടത്തിയതാണ് മുടിമുറിക്കല്‍ എന്നാണ് വിമർശകർ ഉയർത്തുന്ന ആക്ഷേപം. ഇന്നലെ കോടതിയില്‍ ഹാജരാക്കുന്നതിനുമുമ്പ് രാവിലെ ആലുവ ജില്ലാ ആശുപത്രിയില്‍ വൈദ്യപരിശോധനയ്ക്ക് എത്തിച്ചപ്പോഴേക്കും ആർക്കും പ്രതികളെ തിരിച്ചറിയാൻ കഴിഞ്ഞിരുന്നില്ല.
എന്നാല്‍ തങ്ങളുടെ നിർബന്ധപ്രകാരമല്ല സുഹൈല്‍ മുടിപറ്റെവെട്ടിയതെന്നാണ് അധികൃതർ പറയുന്നത്. ഈ വാദത്തെയും പലരും ചോദ്യംചെയ്യുന്നുണ്ട്. ഇത്രയും നാള്‍ മുറിക്കാതെ സ്റ്റൈലില്‍ വളർത്തിക്കൊണ്ടുവന്ന മുടി ഒരുദിവസം പറ്റെവെട്ടാല്‍ തോന്നിയ ചേതോ വികാരം എന്തായിരിക്കും എന്നാണ് അവർ പരിഹാസരൂപേണ ചോദിക്കുന്നത്. ഇത് മനസിലാക്കാൻ സാമാന്യ ബുദ്ധിമാത്രം മതിയെന്നും അവർ പറയുന്നുണ്ട്.
സുഹൈലിനെ രക്ഷപ്പെടുത്താൻ ഉന്നത രാഷ്ട്രീയക്കാരും സിനിമയുമായി ബന്ധമുള്ളവർ വരെ രംഗത്തുണ്ടെന്നും അതിന് അധികൃതരുടെ ഒത്താശ ആവാേളം ഉണ്ടെന്നുമുളള ആക്ഷേപം ശക്തമാകുന്നതിനിടെയാണ് മുടി പറ്റെവെട്ടി ജയില്‍ മേക്കോവറില്‍ സുഹൈല്‍ ഇന്നലെ കോടതിയില്‍ എത്തിയത്.
