ആലപ്പുഴ: ആലപ്പുഴ മെഡിക്കല് കോളേജിലും മരുന്നു ക്ഷാമം രൂക്ഷം. വിലകൂടിയ മരുന്നുകള് ഒന്നും കിട്ടുന്നില്ലെന്ന് രോഗികള് പരാതിപ്പെട്ടു.
മിക്ക വകുപ്പുകളിലെ ഡോക്ടർമാർ എഴുതുന്ന മരുന്നുകളും ഫാർമസിയില് കിട്ടുന്നില്ല. ഉയർന്ന വിലകൊടുത്ത് പുറത്തുനിന്നു മരുന്നു വാങ്ങേണ്ട അവസ്ഥയിലാണ് രോഗികള്. അതേസമയം, ഓർഡർ നല്കിയ മരുന്നുകള് കിട്ടാനുള്ള കാലതാമസമാണ് മരുന്ന് ക്ഷാമത്തിന് കാരണമെന്നാണ് ആശുപത്രി അധികൃതർ പറയുന്നത്.
സംസ്ഥാനത്തെ സർക്കാർ ആശുപത്രികള് കടുത്ത മരുന്ന് ക്ഷാമത്തില് വലയുന്ന അവസ്ഥയാണ്. പ്രമേഹം, ഉയർന്ന രക്തസമ്മർദം തുടങ്ങിയ ജീവിതശൈലി രോഗങ്ങള്ക്കും കീമോതെറാപ്പി, അപസ്മാരം എന്നിവയ്ക്കും ഉപയോഗിക്കുന്ന മരുന്നുകള്ക്കാണ് പ്രധാനമായും ക്ഷാമം നേരിടുന്നത്.
മരുന്ന് ക്ഷാമം പൊതുജനം അറിയാതിരിക്കാൻ പരമാവധി ലോക്കല് പർച്ചേസിംഗ് നടത്താനാണ് ആശുപത്രികള്ക്ക് സർക്കാർ നല്കിയിരിക്കുന്ന നിർദേശം. എന്നാല്, ഭീമമായ കുടിശ്ശികയുള്ളതിനാല് സർക്കാർ ആശുപത്രികള്ക്ക് മരുന്നുകളും ഉപകരണങ്ങളും നല്കാൻ സ്വകാര്യ വിതരണക്കാർ വിസമ്മതിക്കുകയാണ്.
