കോട്ടയം: 2,000 രൂപയ്ക്ക് മുകളിലുള്ള യുപിഐ (UPI) ഇടപാടുകൾക്ക് സർവീസ് ചാർജ് വ്യാപാരികളുടെ മേൽ ഏർപ്പെടുത്തിയ കേന്ദ്ര ഗവൺമെന്റിന്റെയും എൻപിസിഐയുടെയും നടപടിക്കെതിരെ ഓൾ കേരള പെയിന്റ് ഡീലേഴ്സ് അസോസിയേഷൻ (AKPDA) കോട്ടയം ജില്ലാ എക്സിക്യൂട്ടീവ് കമ്മിറ്റി പ്രതിഷേധ പ്രമേയം പാസാക്കി.
ജില്ലാ പ്രസിഡന്റ് എബി എം. പൊന്നാട്ട് അധ്യക്ഷത വഹിച്ച യോഗത്തിൽ ഓൾ കേരള ഹോൾസെയിൽ പെയിന്റ് ഡീലേഴ്സ് അസോസിയേഷൻ പ്രസിഡന്റ് സണ്ണി നെല്ലിത്താനത്ത് കാലായിൽ പ്രമേയം അവതരിപ്പിച്ചു.
ഡിജിറ്റൽ പേയ്മെന്റുകളെ പ്രോത്സാഹിപ്പിച്ച ശേഷം ചെറുകിട-ഇടത്തരം വ്യാപാരികളുടെ മേൽ അധിക സാമ്പത്തിക ബാധ്യത അടിച്ചേൽപ്പിക്കുന്നത് കച്ചവട മേഖലയെ കടുത്ത പ്രതിസന്ധിയിലാക്കുമെന്ന് യോഗം ചൂണ്ടിക്കാട്ടി.
പെയിന്റിംഗ് മേഖലയിൽ ഭൂരിഭാഗം ബില്ലുകളും 2,000 രൂപയ്ക്ക് മുകളിലായതിനാൽ ഈ തീരുമാനം ഡീലർമാരുടെ നിലനിൽപ്പിനെത്തന്നെ ബാധിക്കുമെന്ന് AKPDA ജില്ലാ എക്സിക്യൂട്ടീവ് കമ്മിറ്റി വിലയിരുത്തി.
സമ്മേളനത്തിൽ സംസ്ഥാന വൈസ് പ്രസിഡന്റ് ബെന്നിച്ചൻ കുട്ടഞ്ചറയിൽ, ജോസ് ഞാവളിക്കുന്നേൽ, ജോൺസൺ കൈലാത്ത്, സെക്രട്ടറി അജിത് കുരുവിള, ഷാജി ജോൺ തോട്ടുപുറം, മാത്യു കത്തലാങ്കൽ തുടങ്ങിയവർ പ്രസംഗിച്ചു.
വ്യാപാരികൾക്ക് വലിയ തിരിച്ചടിയാകുന്ന യുപിഐ ചാർജുകൾ ഉടൻ പിൻവലിക്കാൻ കേന്ദ്ര ധനമന്ത്രാലയം തയ്യാറാകണമെന്ന് AKPDA ആവശ്യപ്പെട്ടു.
