അമരാവതി: ആന്ധ്രാപ്രദേശിലെ അനന്തപൂർ ജില്ലയിലുള്ള രാപ്താടു മണ്ഡലത്തിലെ ഗവണ്‍മെന്റ് സ്കൂളില്‍ ശനിയാഴ്ച രാവിലെ ക്ലാസ് നടന്നുകൊണ്ടിരിക്കെ, 21-കാരനായ യുവാവ് പവർ സോയുമായി (മെഷീൻ വാള്‍) പത്താം ക്ലാസ് മുറിയില്‍ അതിക്രമിച്ചു കയറി പെണ്‍കുട്ടികളെ ആക്രമിച്ചു.
നടുക്കുന്ന സംഭവത്തില്‍ ഒരു പെണ്‍കുട്ടിയുടെ തലയ്ക്കും കഴുത്തിനും പുറത്തിനും ഗുരുതരമായി പരിക്കേറ്റു. തടയാൻ ശ്രമിച്ച സഹപാഠിക്കും ആക്രമണത്തില്‍ പരിക്കേറ്റിട്ടുണ്ട്.
പ്രാഥമിക വിവരങ്ങള്‍ അനുസരിച്ച്‌, രാവിലെ 10.30 ഓടെ രാപ്താടു ഗ്രാമത്തിലെ ജില്ലാ പരിഷത്ത് ഹൈസ്കൂളിലാണ് സംഭവം നടന്നത്. അധ്യാപിക ക്ലാസെടുത്തുകൊണ്ടിരിക്കെയാണ് സംഭവം. പരിക്കേറ്റ രണ്ട് പെണ്‍കുട്ടികളെയും ഉടൻ തന്നെ അനന്തപൂരിലെ ഗവണ്‍മെന്റ് ജനറല്‍ ആശുപത്രിയില്‍ എത്തിച്ചു. അതിലൊരാളുടെ നില ഗുരുതരമാണെന്നും എയർ ആംബുലൻസില്‍ ബെംഗളൂരുവിലെ ആശുപത്രിയിലേക്ക് മാറ്റുമെന്നാണ് വിവരം.
ഹേമന്ത് എന്ന ഡുമ്മു ആണ് പ്രതിയെന്ന് പൊലീസ് സ്ഥിരീകരിച്ചു. ആക്രമണത്തിന് ശേഷം ഇയാള്‍ സ്കൂളില്‍ നിന്ന് ഓടി രക്ഷപ്പെട്ടു. പിന്നീട് ധർമ്മവാരം റെയില്‍വേ സ്റ്റേഷനില്‍ വച്ച്‌ ഇയാളെ അറസ്റ്റ് ചെയ്തു. ശ്രീ സത്യസായി ജില്ലയിലെ ധർമ്മവാരം മണ്ഡലത്തിലെ നാഗലൂർ സ്വദേശിയാണ് പ്രതിയെന്നും, ആക്രമിക്കപ്പെട്ട പെണ്‍കുട്ടിയുടെ അകന്ന ബന്ധുവാണെന്നും റിപ്പോർട്ടുകളുണ്ട്.
ആക്രമണം വിദ്യാർത്ഥികളിലും അധ്യാപകരിലും വലിയ ഭീതി സൃഷ്ടിച്ചു. സ്കൂളില്‍ ഭയന്നുവിറച്ച്‌ കരയുന്ന കുട്ടികളുടെ ദൃശ്യങ്ങള്‍ സോഷ്യല്‍ മീഡിയയില്‍ പ്രചരിക്കുന്നുണ്ട്. സംഭവത്തിന്റെ വിവരങ്ങള്‍ ശേഖരിക്കാനും ആക്രമണത്തിന് പിന്നിലെ കാരണം കണ്ടെത്താനും പൊലീസ് അന്വേഷണം ആരംഭിച്ചിട്ടുണ്ട്.
ആക്രമണത്തില്‍ ആന്ധ്രാപ്രദേശ് മുഖ്യമന്ത്രി ചന്ദ്രബാബു നായിഡു തീവ്രമായ ദുഃഖം രേഖപ്പെടുത്തുകയും അടിയന്തര ചികിത്സ ഉറപ്പാക്കാൻ ജില്ലാ-മെഡിക്കല്‍ ഉദ്യോഗസ്ഥരുമായി ബന്ധപ്പെടുകയും ചെയ്തു. കുറ്റവാളിക്ക് പരമാവധി ശിക്ഷ ഉറപ്പാക്കുന്നതിന് കടുത്ത നിയമനടപടികള്‍ സ്വീകരിക്കാനും അദ്ദേഹം പൊലീസിന് നിർദ്ദേശം നല്‍കി.
