ലഖ്നൗ: ഉത്തർപ്രദേശിലെ ആഗ്രയിൽ ഒരു വീട്ടിലെ റഫ്രിജറേറ്ററിനുള്ളിൽ രൂപപ്പെട്ട മഞ്ഞുകട്ടയ്ക്ക് ശിവലിംഗത്തിന്റെ സാദൃശ്യമുണ്ടെന്ന് പ്രചരിച്ചതോടെ വീടിന് മുന്നിൽ ഭക്തജനത്തിരക്ക്. വിവരം നിമിഷങ്ങൾക്കകം നാട്ടിലാകെ പരന്നതോടെ ആളുകൾ എത്തി പൂജയും ജലാഭിഷേകവും നടത്തി.
ആഗ്രയിലെ നഗ്ല ഭുജ മേഖലയിലെ ഒരു വീട്ടിൽ ഫ്രിഡ്ജ് വൃത്തിയാക്കുന്നതിനിടെയാണ് ഫ്രീസറിനുള്ളിൽ പ്രത്യേക ആകൃതിയിൽ രൂപപ്പെട്ട മഞ്ഞുകട്ട വീട്ടുകാർ ശ്രദ്ധിച്ചത്. അമർനാഥിലെ മഞ്ഞു ശിവലിംഗവുമായി ബന്ധപ്പെട്ട വാർത്തകളുടെ പശ്ചാത്തലത്തിൽ ഇത് ദൈവിക പ്രത്യക്ഷമാണെന്ന വിശ്വാസമാണ് കുടുംബം പങ്കുവെച്ചത്.
തുടർന്ന് 'ഹർ ഹർ മഹാദേവ്' മന്ത്രോച്ചാരണങ്ങളോടെ നിരവധി പേർ വീടിലെത്തി ജലാഭിഷേകം നടത്തി. ചിലർ ഫ്രിഡ്ജിനുള്ളിൽ തന്നെ കാണിക്ക സമർപ്പിക്കുകയും ചെയ്തു. സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി വൈറലായിട്ടുണ്ട്.
അതേസമയം, ഫ്രിഡ്ജിനുള്ളിൽ ഇത്തരത്തിൽ ഐസ് രൂപപ്പെടുന്നത് സാധാരണ സ്വാഭാവിക പ്രതിഭാസമാണെന്നും, അതിന് ശിവലിംഗവുമായോ മതവിശ്വാസവുമായോ ശാസ്ത്രീയമായി ബന്ധമില്ലെന്നും നിരവധി പേർ ചൂണ്ടിക്കാട്ടുന്നുണ്ട്.
