തിരുവനന്തപുരം: നടന്മാരായ കുഞ്ചാക്കോ ബോബനും പൃഥ്വിരാജ് സുകുമാരനും വനം വകുപ്പിൻ്റെ ബ്രാൻഡ് അംബാസഡർമാരാകും. വനം - വന്യജീവി സംരക്ഷണ ബോധവല്‍ക്കരണം, വനം വകുപ്പിന്റെ പദ്ധതികളുടെ പ്രചാരണം അടക്കം ഏഴ് പ്രവർത്തന മേഖലകളാണ് ഇരുവർക്കുമുള്ളത്.
ബ്രാൻഡ് അംബാസഡർമാരുടെ പ്രവർത്തനമേഖലകള്‍
1. വനം - വന്യജീവി സംരക്ഷണ ബോധവല്‍ക്കരണം
വനങ്ങള്‍, വന്യജീവികള്‍, ജൈവവൈവിധ്യം, ആവാസവ്യവസ്ഥയുടെ സംരക്ഷണം, പാരിസ്ഥിതിക സന്തുലിതാവസ്ഥ എന്നിവയെക്കുറിച്ച്‌ പൊതുപരിപാടികള്‍, റെക്കോർഡ് ചെയ്ത സന്ദേശങ്ങള്‍, ഡിജിറ്റല്‍ ആശയവിനിമയ മാർഗങ്ങള്‍ എന്നിവയിലൂടെ ബോധവല്‍ക്കരണം നടത്തുക.
2. വനം വകുപ്പിന്റെ പദ്ധതികളുടെ പ്രചാരണം
വകുപ്പിന്റെ തിരഞ്ഞെടുത്ത പദ്ധതികള്‍, പൊതുസേവനങ്ങള്‍, സംരക്ഷണ കാംപെയ്നുകള്‍, പൊതുജന പങ്കാളിത്ത പരിപാടികള്‍ എന്നിവയുടെ പ്രചാരണത്തിന് പിന്തുണ നല്‍കുക.
3. കുട്ടികളുമായും യുവജനങ്ങളുമായും ഇടപെടല്‍
വിദ്യാഭ്യാസ പരിപാടികള്‍, സംവേദനാത്മക സംവാദങ്ങള്‍, പ്രകൃതിപഠന ക്യാമ്പുകള്‍, യുവജനങ്ങള്‍ക്കായുള്ള ഡിജിറ്റല്‍ ഉള്ളടക്കങ്ങള്‍ എന്നിവയിലൂടെ കുട്ടികളിലും വിദ്യാർത്ഥികളിലും യുവാക്കളിലും പ്രകൃതിയോടുള്ള താല്‍പര്യം വളർത്തുക.
4. സാമൂഹ്യ മാധ്യമങ്ങളും പൊതുജന ആശയവിനിമയവും
വകുപ്പിന്റെ ഔദ്യോഗിക സാമൂഹ്യ മാധ്യമ പ്ലാറ്റ്‌ഫോമുകളിലൂടെ സ്ഥിരീകരിച്ച സംരക്ഷണ സന്ദേശങ്ങള്‍, ബോധവല്‍ക്കരണ വീഡിയോകള്‍, വകുപ്പിന്റെ വിവിധ പ്രവർത്തനങ്ങളെക്കുറിച്ചുള്ള വിവരങ്ങള്‍ എന്നിവ പങ്കുവയ്ക്കുക.
5. സർഗാത്മകവും സാംസ്കാരികവുമായ പ്രചാരണം
സിനിമ എന്ന മാധ്യമം പ്രയോജനപ്പെടുത്തി വനം - വന്യജീവി സംരക്ഷണ സന്ദേശങ്ങള്‍ കൂടുതല്‍ ജനങ്ങളിലേക്ക് എളുപ്പത്തില്‍ എത്തിക്കുന്ന നൂതന ആശയവിനിമയ രീതികള്‍ വികസിപ്പിക്കുക.
6. സമൂഹ പങ്കാളിത്തവും മനുഷ്യ - വന്യജീവി സഹവർത്തിത്വവും
വന്യജീവികളോട് ഉത്തരവാദിത്തപരമായ പെരുമാറ്റം പ്രോത്സാഹിപ്പിക്കുക, വനാശ്രിത സമൂഹങ്ങളോട് ആദരവ് പുലർത്തുക, വന്യജീവികളുമായുള്ള ഏറ്റുമുട്ടലുകള്‍ ഉണ്ടാകുമ്പോള്‍ സുരക്ഷിതമായി പ്രതികരിക്കേണ്ട രീതികളെക്കുറിച്ച്‌ ബോധവല്‍ക്കരണം നടത്തുക, സംരക്ഷണ പ്രവർത്തനങ്ങളില്‍ പൊതുജനപങ്കാളിത്തം ഉറപ്പാക്കുക.
7. പ്രകൃതിപഠനവും പരിസ്ഥിതി സാക്ഷരതയും
ആവാസവ്യവസ്ഥകള്‍, ജൈവവൈവിധ്യം, പാരിസ്ഥിതിക പരസ്പരബന്ധങ്ങള്‍, സുസ്ഥിരമായ സഹവർത്തിത്വത്തിന്റെ പ്രാധാന്യം എന്നിവയെക്കുറിച്ച്‌ പൊതുജനങ്ങളുടെ അറിവ് വർധിപ്പിക്കുന്ന പരിപാടികള്‍ക്ക് പിന്തുണ നല്‍കുക.
