ഡല്‍ഹി: സായുധസേനയുടെ അഗ്നിപഥ് പദ്ധതിക്ക് കീഴില്‍ സേവനമനുഷ്ഠിക്കുന്ന അഗ്നിവീറുകളുടെ കരാർ കാലാവധി ആറുവർഷമായി ഉയർത്തി കേന്ദ്രം.
ചീഫ് ഓഫ് ഡിഫൻസ് സ്റ്റാഫ് (സിഡിഎസ്) ജനറല്‍ എൻ എസ് രാജ സുബ്രഹ്മണി വാർത്താസമ്മേളനത്തിലാണ് ഈ സുപ്രധാന പ്രഖ്യാപനം നടത്തിയത്. ഇതോടെ നാലുവർഷത്തെ കാലാവധി പൂർത്തിയാക്കി പുറത്തുപോകേണ്ടിയിരുന്ന ആദ്യ ബാച്ചിലെ 75 ശതമാനം അഗ്നിവീറുകള്‍ക്കും സേനയില്‍ തുടരാം.
ഇന്ത്യൻ പ്രതിരോധസേനയ്ക്കും അഗ്നിവീറുകള്‍ക്കും ഇതൊരു സുപ്രധാന ദിവസമാണെന്ന് രാജ സുബ്രഹ്മണി പറഞ്ഞു. എല്ലാ അഗ്നിവീറുകള്‍ക്കും ഇന്ത്യൻ സൈന്യത്തിന്റെ ഭാഗമാകാനുള്ള വഴി ഇതോടെ തുറക്കപ്പെടുകയാണെന്നും അദ്ദേഹം വ്യക്തമാക്കി.
2022 ജൂണ്‍ 14നാണ് അഗ്നിപഥ് പദ്ധതി അവതരിപ്പിച്ചത്. പ്രകടനത്തിന്റെ അടിസ്ഥാനത്തില്‍ പദ്ധതി കൃത്യമായ ഇടവേളകളില്‍ അവലോകനം ചെയ്യുമെന്ന് അന്ന് വ്യക്തമാക്കിയിരുന്നു.
ആദ്യ ബാച്ചിലെ നാല് വർഷത്തെ കാലാവധി പൂർത്തിയാകുന്ന സാഹചര്യത്തില്‍ മികച്ച പ്രതികരണമാണ് ലഭിച്ചതെന്നും അദ്ദേഹം കൂട്ടിച്ചേർത്തു. നിലവിലെ നിയമപ്രകാരം മികച്ച പ്രകടനം കാഴ്ചവയ്ക്കുന്ന 25 ശതമാനം അഗ്നിവീറുകളെ മാത്രമെ സ്ഥിര സൈന്യത്തില്‍ ഉള്‍പ്പെടുത്താൻ സാധിക്കുമായിരുന്നുള്ളൂ.
ബാക്കി 75 ശതമാനം പേർ നാലുവർഷത്തിന് ശേഷം പിരിഞ്ഞുപോകണമായിരുന്നു. എന്നാല്‍ പുതിയ പരിഷ്കരണത്തോടെ ഈ 75 ശതമാനം പേർക്കും രണ്ടുവർഷം കൂടി അധികമായി സേവനമനുഷ്ഠിക്കാനുള്ള അവസരം ലഭിക്കും.
ആറുവർഷത്തെ കാലാവധി പൂർത്തിയാകുമ്പോള്‍ താല്‍പ്പര്യമുള്ള എല്ലാവരെയും കൃത്യമായ യോഗ്യതാ മാനദണ്ഡങ്ങളുടെ അടിസ്ഥാനത്തില്‍ സായുധ സേനയില്‍ സ്ഥിരനിയമനത്തിനായി പരിഗണിക്കുമെന്നും സിഡിഎസ് ജനറല്‍ വ്യക്തമാക്കി.
നാലുവർഷത്തെ കുറഞ്ഞ സേവന കാലാവധിക്കെതിരെ ഉയർന്ന വ്യാപകവിമർശനങ്ങള്‍ക്കിടെയാണ് കേന്ദ്ര സർക്കാരിന്റെ നിർണായക തീരുമാനം.
