ഡല്‍ഹി: യുഎസ് ഇടക്കാല തിരഞ്ഞെടുപ്പില്‍ ഡൊണാള്‍ഡ് ട്രംപിനേറ്റ കനത്ത തിരിച്ചടിയെ പരാമർശിച്ച്‌ കോക്രോച്ച്‌ ജനതാ പാർട്ടി (സിജെപി) സ്ഥാപകൻ അഭിജിത് ദിപ്കെ ബുധനാഴ്ച പരിഹാസരൂപേണയുള്ള പ്രസ്താവന നടത്തി.
ട്രംപിന് ഇത് സംഭവിക്കാൻ ഗ്യാനേഷ് കുമാർ ഒരിക്കലും സമ്മതിക്കില്ലായിരുന്നു" എന്ന സോഷ്യല്‍ മീഡിയ കുറിപ്പുമായാണ് പരിഹാസ സംഘടനയായ സിജെപിയുടെ സ്ഥാപകൻ രംഗത്തുവന്നത്.
സിജെപിയുടെ മറ്റൊരു നേതാവ് അശുതോഷ് റാങ്കയുടെ ' ബ്രസീല്‍, സെർബിയ, യു എസ്' എന്ന പോസ്റ്റിനു മടുപടിയായി, "ആളുകള്‍ വിദ്വേഷ രാഷ്ട്രീയത്തിനെതിരെയും ഉത്തരവാദിത്തം, തൊഴില്‍, കുറഞ്ഞ ജീവിതച്ചെലവ് എന്നിവയ്‌ക്ക് അനുകൂലമായും വോട്ട് ചെയ്യുന്നു," എന്ന് ദിപ്കെ കുറിച്ചു. തന്റെ മൂന്നാമത്തെ ട്വീറ്റില്‍, 2010-ന് ശേഷം ലോകമെമ്പാടും ഏകാധിപത്യ/ശക്തരായ നേതാക്കളുടെ രാഷ്ട്രീയം വീണ്ടും ശക്തമായതായി ദിപ്കെ ചൂണ്ടിക്കാണിച്ചു.
നിർണ്ണായകമായ നേതൃത്വം, ദേശീയ മഹിമ, ആഗോള മേധാവിത്വം എന്നിവ വാഗ്ദാനം ചെയ്തുകൊണ്ടാണ് പല നേതാക്കളും ജനപ്രീതി നേടിയെടുത്തത്. ജനാധിപത്യ സ്ഥാപനങ്ങള്‍ക്കും വ്യവസ്ഥകള്‍ക്കും നല്‍കാൻ കഴിയാത്ത കാര്യങ്ങള്‍ കരുത്തനായ ഒരു നേതാവിന് സാധിക്കുമെന്നും അവർ വാദിച്ചു. എന്നിരുന്നാലും, ഈ ഏകാധിപത്യ രാഷ്ട്രീയത്തിലുള്ള വിശ്വാസം ക്രമേണ തകരാൻ തുടങ്ങിയിരിക്കുന്നു എന്നാണ് സമീപകാല രാഷ്ട്രീയ ട്രെൻഡുകള്‍ സൂചിപ്പിക്കുന്നത്.
"ശക്തനാണെന്ന് അവകാശപ്പെടുന്ന ഒരാളില്‍ അധികാരം കേന്ദ്രീകരിക്കുന്നത് കൊണ്ട് ഒരു രാജ്യം ശക്തമാകണമെന്നില്ലെന്ന് ജനങ്ങള്‍ തിരിച്ചറിയുകയാണ്. അവർ പണ്ട് അവഗണിച്ചിരുന്ന ജനാധിപത്യ സ്വാതന്ത്ര്യങ്ങളുടെയും ഉത്തരവാദിത്തത്തിന്റെയും ഭരണഘടനാ സ്ഥാപനങ്ങളുടെയും മൂല്യം പുനർകണ്ടെത്തുകയാണ്," അദ്ദേഹം എക്സില്‍ കുറിച്ചു.
എസ്‌ഐ‌ആറിനെതിരെ രാജ്യത്ത് നടക്കുന്ന പ്രതിഷേധത്തിന്റെ പശ്ചാത്തലത്തിലാണ് ദിപ്കെയുടെ പരിഹാസ പോസ്റ്റ് എക്സില്‍ പ്രത്യക്ഷപ്പെട്ടത്. എസ്‌ഐ‌ആർ മൂലം അർഹതപ്പെട്ട വോട്ടുകള്‍ വെട്ടിക്കുറച്ചുവെന്നാണ് സിജെപിയും പ്രതിപക്ഷ കക്ഷികളും ആരോപിക്കുന്നത്. പ്രധാനമന്ത്രി നരേന്ദ്ര മോദി ശക്തനായ നേതാവാണെന്ന ആഗോള അംഗീകാരവും ദിപ്കെയുടെ പോസ്റ്റിനെ സ്വാധീനിച്ചുവെന്നു വേണം കരുതാൻ.
