കൊച്ചി: മലയാളം ടെലിവിഷൻ ചരിത്രത്തിലെ തന്നെ ഏറ്റവും ശ്രദ്ധേയമായ വാർത്താധിഷ്ഠിത പരിപാടികളില് ഒന്നായ 'മാധ്യമവിചാരം' വീണ്ടും പ്രേക്ഷകരിലേക്ക് എത്തുന്നു.
കൈരളി ടിവിയില് 26 വർഷങ്ങള്ക്ക് മുൻപ് ആരംഭിച്ച് വലിയ ജനപ്രീതി നേടിയ ഈ പരിപാടി, നീണ്ട 16 വർഷത്തെ ഇടവേളയ്ക്ക് ശേഷമാണ് പുതിയ രൂപത്തില് തിരിച്ചെത്തുന്നത്. ഗൃഹാതുരത്വമുണർത്തുന്ന ഈ തിരിച്ചുവരവ് വാർത്താ നിരീക്ഷകർക്കും പ്രേക്ഷകർക്കും ഒരുപോലെ ആവേശം നല്കുന്നതാണ്.
കാലത്തിന്റെ മാറ്റങ്ങള് ഉള്ക്കൊണ്ട് പുതിയൊരു മുഖത്തോടെയാണ് മാധ്യമവിചാരം രണ്ടാം വരവിനൊരുങ്ങുന്നത്. പരമ്പരാഗത ടെലിവിഷൻ സ്ക്രീനില് നിന്നും മാറി, പുതിയ കാലത്തെ പ്രേക്ഷകരെ ലക്ഷ്യമിട്ട് ഡിജിറ്റല് പ്ലാറ്റ്ഫോമിലൂടെയാണ് പരിപാടി സംപ്രേഷണം ചെയ്യുന്നത്. മാധ്യമവിചാരത്തിന്റെ മുഖമായിരുന്ന പ്രശസ്ത മാധ്യമ നിരീക്ഷകൻ സെബാസ്റ്റ്യൻ പോള് തന്നെയാണ് ഇത്തവണയും അവതാരകനായി എത്തുന്നത്. യാതൊരുവിധ രാഷ്ട്രീയ പക്ഷപാതിത്വവുമില്ലാതെ, തികച്ചും സ്വതന്ത്രവും നിഷ്പക്ഷവുമായ അവതരണ ശൈലിയായിരിക്കും തന്റേതെന്ന് അദ്ദേഹം വ്യക്തമാക്കിയിട്ടുണ്ട്. ‘മാധ്യമവിചാരം’ എന്ന പരിചിതമായ പേര് നിലനിർത്തുമ്പോഴും, കേവലം മാധ്യമ വിശകലനങ്ങളില് മാത്രം ഒതുങ്ങിനില്ക്കാതെ നിലവിലെ രാഷ്ട്രീയ സാഹചര്യങ്ങളും മറ്റ് പ്രധാന സമകാലിക വിഷയങ്ങളും പരിപാടിയില് ആഴത്തില് ചർച്ച ചെയ്യപ്പെടും.
ഡിജിറ്റല് മാധ്യമ രംഗത്ത് സജീവവും സ്വതന്ത്രവുമായ രാഷ്ട്രീയ-സാമൂഹിക ചർച്ചകള്ക്ക് വലിയ സ്വീകാര്യത ലഭിക്കുന്ന കാലമാണിത്. കൃത്യമായ വിലയിരുത്തലുകളും നിഷ്പക്ഷമായ നിലപാടുകളും മുഖമുദ്രയാക്കിയ മാധ്യമവിചാരം തിരികെ എത്തുമ്പോള്, അത് പുതിയ തലമുറയ്ക്കും പഴയ തലമുറയ്ക്കും ഒരുപോലെ വിജ്ഞാനപ്രദമായ ഒരു അനുഭവമായിരിക്കും എന്ന് ഉറപ്പാണ്. സ്വന്തം യൂട്യൂബ് ചാനലിലൂടെയാണ് സെബാസ്റ്റ്യന് പോള് മാധ്യമവിചാരം പങ്കുവെയ്ക്കുന്നത്.
