തിരുവനന്തപുരം: ശബരിമലയില് നടക്കുന്ന ചിങ്ങമാസ, ഓണം പൂജ എന്നിവയോടനുബന്ധിച്ച് അയ്യപ്പഭക്തരുടെ യാത്ര സുഗമവും സുരക്ഷിതവുമാക്കുന്നതിനായി കെഎസ്ആർടിസി വിപുലമായ യാത്രാ ക്രമീകരണങ്ങള് ഏർപ്പെടുത്തി.
ഓഗസ്റ്റ് 16 മുതല് 28 വരെ വിവിധ കെഎസ്ആർടിസി യൂണിറ്റുകളില് നിന്ന് പമ്പയിലേക്കും തിരിച്ചും പ്രത്യേക സർവീസുകള് ക്രമീകരിച്ചിട്ടുണ്ട്. തിരുവനന്തപുരം, ചെങ്ങന്നൂർ, പത്തനംതിട്ട, കൊട്ടാരക്കര, എരുമേലി, പുനലൂർ തുടങ്ങിയ പ്രധാന കേന്ദ്രങ്ങളില് നിന്ന് പമ്പയിലേക്ക് ആവശ്യാനുസരണം സർവീസുകള് ലഭ്യമാകും.
ട്രെയിൻ മാർഗം ചെങ്ങന്നൂർ റെയില്വേ സ്റ്റേഷനില് എത്തുന്ന അയ്യപ്പഭക്തരുടെ തിരക്ക് പരിഗണിച്ച് ചെങ്ങന്നൂർ റെയില്വേ സ്റ്റേഷൻ-പമ്പ റൂട്ടില് ആവശ്യാനുസരണം ഏത് സമയത്തും സർവീസുകള് ക്രമീകരിക്കുന്നതിനുള്ള സംവിധാനം ഒരുക്കിയിട്ടുണ്ട്. പമ്പയില് നിന്ന് ചെങ്ങന്നൂരിലേക്കും യാത്രക്കാരുടെ ആവശ്യത്തിനനുസരിച്ച് സർവീസുകള് ഉണ്ടായിരിക്കും. ശബരിമല തീർഥാടകരുടെ യാത്ര കൂടുതല് സുഗമമാക്കുന്നതിനായി നിലയ്ക്കല്-പമ്പ ചെയിൻ സർവീസുകളും വിപുലമായി ക്രമീകരിച്ചിട്ടുണ്ട്.
മുൻകൂട്ടി ബുക്കിങ് സൗകര്യം
തിരുവനന്തപുരം സെൻട്രല് ഡിപ്പോയില് നിന്ന് യാത്രക്കാരുടെ ആവശ്യാനുസരണം ബസുകള് മുൻകൂട്ടി ബുക്ക് ചെയ്യുന്നതിനുള്ള സൗകര്യവും ഏർപ്പെടുത്തിയിട്ടുണ്ട്. തിരക്ക് വർധിക്കുന്ന ദിവസങ്ങളില് ഭക്തരുടെ ആവശ്യാനുസരണം സമീപ കെഎസ്ആർടിസി യൂണിറ്റുകളില് നിന്ന് അധിക സർവീസുകള് ക്രമീകരിക്കുന്നതിനുള്ള സംവിധാനവും ഒരുക്കിയിട്ടുണ്ട്. ഭക്തരുടെ തിരക്ക്, യാത്രാ ആവശ്യം എന്നിവ നിരന്തരം വിലയിരുത്തി ആവശ്യമായ അധിക സർവീസുകള് ഏർപ്പെടുത്തുന്നതിനും കെഎസ്ആർടിസി നടപടി സ്വീകരിക്കും
ബന്ധപ്പെടേണ്ട നമ്പറുകള്
കൂടുതല് വിവരങ്ങള്ക്കും സഹായങ്ങള്ക്കുമായി വിവിധ യൂണിറ്റുകളുമായും കണ്ട്രോള് റൂമുമായും ബന്ധപ്പെടാവുന്നതാണ്. കെഎസ്ആർടിസി പമ്പ: 04735203445, 9497024092. കെഎസ്ആർടിസി ചെങ്ങന്നൂർ: 9188933750. കെഎസ്ആർടിസി പത്തനംതിട്ട: 9188933744. 24 മണിക്കൂറും പ്രവർത്തിക്കുന്ന കെഎസ്ആർടിസി കണ്ട്രോള് റൂം: 9447071021, 04712463799.
