കോതമംഗലം: വാഹനാപകടത്തിൽ മരിച്ച സുഹൃത്തിന് അന്തിമോപചാരം അർപ്പിച്ച് മടങ്ങുന്നതിനിടെ ബൈക്ക് യാത്രികൻ ചെക്ക് പോസ്റ്റിലെ ക്രോസ് ബാറിൽ തലയിടിച്ച് മരിച്ചു. ഇടുക്കി കഞ്ഞിക്കുഴി ആൽപ്പാറ വഴേപ്പറമ്പിൽ മോൻസി ജോർജ് (48) ആണ് മരിച്ചത്.
ബുധനാഴ്ച രാത്രി 11.40ഓടെ തട്ടേക്കാട് പക്ഷിസങ്കേതത്തിന് സമീപത്തെ ചെക്ക് പോസ്റ്റിലെ ക്രോസ് ബാറിൽ തല ഇടിച്ച് റോഡിലേക്ക് തെറിച്ചുവീണ മോൻസിയെ രക്തം വാർന്ന നിലയിൽ കണ്ടെത്തുകയായിരുന്നു. ഉടൻ കോതമംഗലത്തെ ആശുപത്രിയിലേക്ക് കൊണ്ടുപോയെങ്കിലും വഴിമധ്യേ മരിച്ചു.
വാഹനാപകടത്തിൽ മരിച്ച സുഹൃത്തിന് അന്തിമോപചാരം അർപ്പിച്ച് ബൈക്കിൽ മടങ്ങുന്നതിനിടെയായിരുന്നു അപകടം. ചേലച്ചുവടിലെ ഒരു ഹോട്ടലിലെ ജീവനക്കാരനായിരുന്നു മോൻസി.
പരേതരായ ജോർജിന്റെയും ലീലാമ്മയുടെയും മകനാണ്. സഹോദരങ്ങൾ: ഗ്രേസി, ബിൻസി. സംസ്കാരം നടത്തി.
