കാസർഗോഡ്: മദ്യപിച്ച് ദേശീയപാതയിലൂടെ അപകടകരമായ രീതിയിൽ വാഹനമോടിച്ച യൂട്യൂബർ എസ്.ആർ. ധന്യയുടെ ഡ്രൈവിംഗ് ലൈസൻസ് സസ്പെൻഡ് ചെയ്തു.
മൂന്ന് മാസത്തേക്കാണ് ലൈസൻസ് സസ്പെൻഡ് ചെയ്തതെന്ന് മോട്ടോർവാഹന വകുപ്പ് വ്യക്തമാക്കി.
ഹെലൻ ഓഫ് സ്പാർട്ട എന്ന പേരിൽ അറിയപ്പെടുന്ന ധന്യയ്ക്ക് ലൈസൻസ് സസ്പെൻഷന് പുറമെ മോട്ടോർവാഹന വകുപ്പിന്റെ മൂന്ന് ദിവസത്തെ പരിശീലന ക്ലാസിലും പങ്കെടുക്കണം.
കഴിഞ്ഞ ജൂലൈ ഒന്നിനാണ് നടപടിക്ക് കാരണമായ സംഭവം നടന്നത്. ഒരു ചടങ്ങിൽ പങ്കെടുത്ത് മടങ്ങുന്നതിനിടെ ധന്യ മദ്യപിച്ച് വാഹനമോടിക്കുകയായിരുന്നു.
പരിശോധനയ്ക്കെത്തിയ പോലീസിനെ കണ്ടതോടെ വാഹനം നിർത്താതെ അമിതവേഗത്തിൽ ഓടിച്ചുപോകുകയായിരുന്നു. തുടർന്ന് പോലീസ് സംഘം വാഹനത്തെ പിന്തുടർന്നു.
കിലോമീറ്ററുകളോളം അപകടകരമായ രീതിയിൽ വാഹനം ഓടിച്ച ശേഷമാണ് പോലീസ് വാഹനം തടഞ്ഞ് ധന്യയെ പിടികൂടിയത്. തുടർന്ന് വാഹനവും കസ്റ്റഡിയിലെടുക്കുകയായിരുന്നു.
