തിരുവനന്തപുരം: ജോലിയുടെ സമ്മർദങ്ങളില്‍ നിന്നും ജീവിതത്തിൻ്റെ വിരസതയില്‍ നിന്നും കുറച്ചുനേരത്തേയ്ക്ക് മാറി നില്‍ക്കാൻ ആഗ്രഹിക്കുന്നവർ ആദ്യം തെരഞ്ഞെടുക്കുക യാത്രയാണ്.
എന്നാല്‍ യാത്രയ്ക്കും താമസത്തിനും ഭക്ഷണത്തിനുമൊക്കെയായി വലിയ തുക ചെലവാകും എന്നോർക്കുമ്പോള്‍ പലരും പിൻമാറും. അങ്ങനെയുള്ളവർക്ക് ഒരു കൈത്താങ്ങാവുകയാണ് കേരള സർക്കാർ.
വിനോദയാത്രയ്ക്കുള്ള ചെലവുകളുടെ ഭാരം കുറയ്ക്കാനുള്ള പുതിയ പദ്ധതിയാണ് വനംവകുപ്പ് ആവിഷ്കരിച്ചിരിക്കുന്നത്. 'ട്രാവല്‍ ടുഡേ, പേ ടുമാറോ' എന്നാണ് പദ്ധതിയുടെ പേര്.
സഞ്ചാരികള്‍ക്ക് അവരുടെ യാത്രയ്ക്കുള്ള ചെലവുകള്‍ തവണകളായി അടച്ചുതീർക്കാനുള്ള അവസരമാണ് ഈ പദ്ധതിയിലൂടെ ലഭിക്കുന്നത്. വനംവകുപ്പിന്റെ ടൂറിസം പാക്കേജുകള്‍ക്കും യാത്രകള്‍ക്കും മുഴുവൻ തുകയും നല്‍കാതെ, തവണകളായി പണമടച്ച്‌ ആസ്വദിക്കാൻ കഴിയും.
കേരള ഫോറസ്റ്റ് ഡെവലപ്‌മെന്റ് കോർപ്പറേഷനാണ് ഈ പുതിയ ക്രെഡിറ്റ് ടൂറിസം പദ്ധതി തുടങ്ങിയിരിക്കുന്നത്. ഇതിനായി ആക്സിസ് ബാങ്കുമായി ചേർന്ന് വായ്പാ സൗകര്യം ഏർപ്പെടുത്തിയിട്ടുണ്ട്.
കെഎഫ്ഡിസി നേരിട്ട് നടത്തുന്ന സംസ്ഥാനത്തെ 7 പ്രധാന വിനോദസഞ്ചാര കേന്ദ്രങ്ങളില്‍ ആണ് ആദ്യ ഘട്ടത്തില്‍ പദ്ധതി നടപ്പിലാക്കുന്നത്.
ഒപ്പം തന്നെ 'വർക്ക് ഫ്രം ഫോറസ്റ്റ്' (വർക്കേഷൻ) പദ്ധതിയും സർക്കാർ തുടങ്ങിയിട്ടുണ്ട്. സംസ്ഥാനത്തെ സംരക്ഷിത വനങ്ങള്‍ക്കുള്ളില്‍ ഇരുന്ന് ജോലി ചെയ്യാനുള്ള അവസരമാണ് പദ്ധതിയിലൂടെ ഒരുക്കുന്നത്.
പത്തനംതിട്ടയിലെ ഗവി, ഇടുക്കിയിലെ സൂര്യനെല്ലി എന്നീ രണ്ട് പരിസ്ഥിതി സൗഹൃദ വിനോദസഞ്ചാര കേന്ദ്രങ്ങളിലാണ് പദ്ധതി ആരംഭിച്ചിരിക്കുന്നത്. ഇതിൻ്റെ ഭാഗമായി വനത്തില്‍ നിലവിലുള്ള മുറികളില്‍ സർഗാത്മകമായി ജോലി ചെയ്യുന്നവർക്കും പ്രൊഫഷണലുകള്‍ക്കുമായി ഡിജിറ്റല്‍ സൗകര്യങ്ങള്‍ കുറഞ്ഞ നിരക്കില്‍ ഒരുക്കിയിട്ടുണ്ട്.
പ്രകൃതി സംരക്ഷണവും റിമോട്ട് വർക്കിങ്ങും തമ്മില്‍ കൂട്ടിയോജിപ്പിക്കുക എന്ന ലക്ഷ്യത്തോടെ കേരള ഫോറസ്റ്റ് ഡെവലപ്‌മെന്റ് കോർപ്പറേഷനാണ് പദ്ധതി നടപ്പാക്കുന്നത്.
