തിരുവനന്തപുരം: വന്യജീവി ആക്രമണങ്ങളില്‍ കൊല്ലപ്പെടുന്നവരുടെ ആശ്രിതർക്കുള്ള നഷ്ടപരിഹാര തുക വർദ്ധിപ്പിച്ച്‌ സംസ്ഥാന സർക്കാർ ഉത്തരവിറക്കി.
ജനങ്ങളുടെ ദീർഘകാല ആവശ്യങ്ങള്‍ കണക്കിലെടുത്താണ് ഫോറസ്റ്റ് ഡിപ്പാർട്ട്‌മെന്റിന്റെ ഈ നിർണായക നീക്കം.
പുതിയ ഉത്തരവ് പ്രകാരം പാമ്പ്, തേനീച്ച, കടന്നല്‍ എന്നിവ ഒഴികെയുള്ള വന്യജീവി ആക്രമണങ്ങളില്‍ മരണം സംഭവിച്ചാല്‍ ആശ്രിതർക്ക് നല്‍കുന്ന സഹായധനം 14 ലക്ഷം രൂപയില്‍ നിന്ന് 17.5 ലക്ഷം രൂപയായി ഉയർത്തിയിട്ടുണ്ട്.
അതേസമയം പാമ്പ് കടി, തേനീച്ച അല്ലെങ്കില്‍ കടന്നല്‍ കുത്ത് എന്നിവ മൂലം മരണം സംഭവിച്ചാല്‍ കുടംബത്തിന് നല്‍കുന്ന നഷ്ടപരിഹാര തുക നാല് ലക്ഷം രൂപയില്‍ നിന്ന് അഞ്ച് ലക്ഷം രൂപയായി വർദ്ധിപ്പിച്ചു.
ഇതിനുപുറമേ, വന്യജീവി ആക്രമണങ്ങളില്‍ ഗുരുതരമായി പരിക്കേല്‍ക്കുന്നവർക്കുള്ള സാമ്പത്തിക സഹായത്തിലും സർക്കാർ വലിയ തോതില്‍ വർദ്ധന വരുത്തിയിട്ടുണ്ട്.
