ചേർത്തല: ദേശീയപാത നവീകരണത്തിന്റെ ഭാഗമായുള്ള കാന നിർമാണത്തിനായി നഗരസഭാ റോഡ് മുറിച്ചിട്ട് ഒരു വർഷം കഴിഞ്ഞിട്ടും പണി പൂർത്തിയാക്കാത്തതിനെത്തുടർന്ന് നഗരസഭ 14-ാം വാർഡിലെ ഇരുപതോളം കുടുംബങ്ങള്‍ ഒറ്റപ്പെട്ടു.
ചേർത്തല പൊലീസ് സ്റ്റേഷന് വടക്കുഭാഗത്താണ് ജനജീവിതത്തെ ദുസ്സഹമാക്കുന്ന ഈ ദുരവസ്ഥ. ചേർത്തല നഗരത്തില്‍ നിന്നു തുടങ്ങി 14-ാം വാർഡിലൂടെ കടന്ന് ദേശീയപാതയില്‍ ചേരുന്ന പ്രധാന നഗരസഭാ റോഡാണ് പൊലീസ് സ്റ്റേഷന് മുന്നിലൂടെയുള്ള കാനയ്ക്കായി പൂർണമായും പൊളിച്ചിട്ടത്.
മഴക്കാലത്ത് നഗരത്തിലെ വെള്ളക്കെട്ട് ഒഴിവാക്കി വെള്ളം എ എസ് കനാലിലേക്ക് ഒഴുക്കിവിടാനാണ് കാന നിർമിക്കുന്നത്. ഒരു വർഷം മുൻപ് കാനയ്ക്കായി ആഴത്തില്‍ കുഴിയെടുത്ത് ഇരുവശങ്ങളിലും കോണ്‍ക്രീറ്റ് ഭിത്തി കെട്ടിയതോടെ പണി നിലച്ചു.
സ്ലാബ് ഇടുകയോ റോഡ് പൂർവസ്ഥിതിയിലാക്കുകയോ ചെയ്യാത്തതിനാല്‍ വീടുകളില്‍ നിന്ന് ദേശീയപാതയിലേക്ക് കടക്കാൻ പോലും വഴിയില്ലാതായി. രോഗികളെ പുറത്തേക്കു കൊണ്ടുപോകാൻ ഓട്ടോറിക്ഷകള്‍ക്കു പോലും എത്താനാകുന്നില്ല.
ഒറ്റപ്പെട്ട മഴ പെയ്താല്‍പ്പോലും കാനയ്ക്കായി കുഴിച്ച കുഴിയില്‍ വെള്ളം നിറഞ്ഞ് സമീപത്തെ വീടുകളിലേക്ക് ഇരച്ചുകയറുകയാണ്. നഗരസഭ മണ്ണുമാന്തി യന്ത്രം ഉപയോഗിച്ച്‌ വെള്ളം കോരിക്കളഞ്ഞ് താല്‍ക്കാലിക പരിഹാരം കാണുക മാത്രമാണ് ചെയ്യുന്നത്.
