കൊല്ലം : പിണങ്ങി താമസിച്ചിരുന്ന ഭാര്യയെ ഭർത്താവ് വെട്ടിപ്പരുക്കേൽപ്പിച്ചു. അഞ്ചൽ സ്വദേശി അശ്വതിക്കാണ് പരുക്കേറ്റത്. ഭർത്താവ് ഇടമൺ സ്വദേശി മനോജിനെ പോലീസ് അറസ്റ്റ് ചെയ്തു. മനോജുമായി പിണങ്ങി ആൺ സുഹൃത്തിനൊപ്പം വാടകയ്ക്ക് താമസിക്കുകയായിരുന്നു അശ്വതി.
അഞ്ചലിലെ സ്വകാര്യ സ്കൂളിലെ ജീവനക്കാരിയായ യുവതി ഇന്ന് രാവിലെ സ്കൂളിൽ എത്തിയപ്പോഴാണ് ആക്രമണം. അശ്വതിയെ കൊലപ്പെടുത്തണമെന്ന ഉദ്ദേശ്യത്തോടെ ആയുധവുമായി മനോജ് സ്കൂളിന്റെ പരിസരത്തെത്തി. തുടർന്ന് യുവതിയുടെ കഴുത്തിന് വെട്ടുകയായിരുന്നു. തടയാൻ ശ്രമിച്ചപ്പോൾ കൈക്ക് പരുക്കേൽക്കുകയും ചെയ്തു.
ആൺ സുഹൃത്തിനൊപ്പം അശ്വതി മറ്റൊരു വീട്ടിൽ കഴിയുന്നതിൽ മനോജ് മനോവിഷമത്തിലായിരുന്നു. ഇതിൽ പ്രകോപിതനായാണ് പ്രതി കൊലപാതക ശ്രമം നടത്തിയതെന്ന് പൊലീസ് പറഞ്ഞു. കൃത്യത്തിന് ശേഷം കടന്നുകളയാൻ ശ്രമിച്ച മനോജിനെ അഞ്ചൽ ടൗണിൽ വച്ച് പൊലീസ് കസ്റ്റഡിയിലെടുക്കുകയായിരുന്നു.
