തിരുവനന്തപുരം: വയനാട് ബത്തേരി നെന്മേനി ചമയംകുന്നില്‍ പശുഫാം നടത്തുന്ന ക്ഷീരകർഷകരായ സ്റ്റെഫിൻ പോളിന്റെയും ഭർത്താവ് സുഭാഷ് ജോയിയുടെയും പ്രശ്നത്തില്‍ ഇടപെട്ട് മൃഗസംരക്ഷണ, ക്ഷീരവികസന വകുപ്പ് മന്ത്രി ബിന്ദു കൃഷ്ണ.
കർഷകയായ സ്റ്റെഫിൻ പോളുമായി ഫോണില്‍ സംസാരിച്ച മന്ത്രി ആവശ്യമായ എല്ലാ പിന്തുണയും ഉറപ്പുനല്‍കി.
ജില്ലയുടെ ചുമതലയുള്ള മന്ത്രി ടി. സിദ്ദിഖുമായി മന്ത്രി ബിന്ദു കൃഷ്ണ വിഷയം സംസാരിച്ചു. ക്ഷീരകർഷക ദമ്പതികള്‍ക്ക് ആവശ്യമായ സഹായങ്ങളും ക്രമീകരണങ്ങളും പ്രാദേശികമായി ഒരുക്കാൻ ഇടപെടലുകള്‍ നടത്തുന്നുണ്ടെന്ന് മന്ത്രി ടി. സിദ്ദിഖ് മന്ത്രിയെ അറിയിച്ചു.
വിഷയത്തില്‍ വിശദമായ പരിശോധന നടത്താൻ ക്ഷീരവികസന വകുപ്പ് ഡെപ്യൂട്ടി ഡയറക്ടറോടും, മൃഗസംരക്ഷണ വകുപ്പ് ജില്ലാ ഓഫീസറോടും മന്ത്രി ബിന്ദു കൃഷ്ണ നിർദേശിച്ചു. ഫാം സന്ദർശിച്ച്‌ സ്ഥിതിഗതികള്‍ നേരിട്ട് വിലയിരുത്താനും ആവശ്യമായ തുടർനടപടികള്‍ സ്വീകരിക്കാനുമാണ് നിർദേശം.
നേരത്തെയും വിഷയം വകുപ്പിന്റെ ശ്രദ്ധയില്‍പ്പെട്ടതിനെ തുടർന്ന് പരിശോധന നടത്തിയിരുന്നു. അന്ന് നടത്തിയ പരിശോധനയില്‍ കർഷകരുടെ ഭാഗത്ത് തെറ്റില്ലെന്നാണ് കണ്ടെത്തിയിരുന്നത്.
സമ്പാദ്യവും വായ്പയുമുള്‍പ്പെടെ രണ്ട് കോടിയോളം രൂപ ചെലവഴിച്ച്‌ എഴുപതിലധികം പശുക്കളുമായി ഫാം നടത്തുന്ന കർഷക ദമ്പതികള്‍ നേരിടുന്ന പ്രതിസന്ധി ഗൗരവത്തോടെയാണ് സർക്കാർ കാണുന്നത്.
