കൊച്ചി: സംസ്ഥാന വഖഫ് ബോർഡിലേക്ക് അമുസ്‌ലിം പ്രതിനിധികളെ ഉള്‍പ്പെടുത്തണമെന്ന് ആവശ്യപ്പെട്ട് ക്രൈസ്തവ സംഘടനയായ 'ആക്‌ട്സ്' (Association of Christian Trust Services - ACTS) ഹൈക്കോടതിയെ സമീപിച്ചു.
വഖഫ് ബോർഡിലേക്ക് പരിഗണിക്കുന്നതിനായി ഏഴുപേർ അടങ്ങുന്ന പട്ടികയും സംഘടന കോടതിക്ക് കൈമാറി.
പുതിയതായി പുനഃസംഘടിപ്പിക്കുന്ന വഖഫ് ബോർഡില്‍ ഒരു ഹിന്ദു അംഗത്തെയും ഒരു ക്രിസ്ത്യൻ അംഗത്തെയും ഉള്‍പ്പെടുത്തണമെന്നാണ് ഹർജിയിലെ പ്രധാന അഭ്യർഥന.
വഖഫ് ബോർഡ് പുനഃസംഘടനയുമായി ബന്ധപ്പെട്ട് മുൻ ചെയർമാൻ കെ.എസ് ഹംസ നല്‍കിയ ഹർജിയില്‍ കക്ഷി ചേരാൻ നല്‍കിയ അപേക്ഷയിലാണ് ക്രൈസ്തവ സംഘടന ഈ ആവശ്യം ഉന്നയിച്ചിരിക്കുന്നത്.
കേന്ദ്ര മന്ത്രിയും ബിജെപി എംപിയുമായ സുരേഷ് ഗോപി, സിപിഎം എംപി കെ.രാധാകൃഷ്ണൻ എന്നിവരുടെ പേരുകളും സംഘടന സമർപ്പിച്ച ഏഴംഗ പട്ടികയില്‍ ഉള്‍പ്പെടുന്നുണ്ട്.
