കോഴിക്കോട്: വഖഫ് ബോർഡ് പുനഃസംഘടിപ്പിച്ചത് എല്ലാ മുസ്‌ലിം സംഘടനകള്‍ക്കും പ്രാതിനിധ്യം നല്‍കിക്കൊണ്ടാണെന്ന് മുസ്‌ലിം ലീഗ് സംസ്ഥാന പ്രസിഡന്റ് സാദിഖലി തങ്ങള്‍.
ഇപ്പോള്‍ പരിഗണിക്കപ്പെടാത്തവർക്ക് ഹജ്ജ് കമ്മിറ്റി, മദ്രസ ക്ഷേമനിധി ബോർഡ് തുടങ്ങിയ മറ്റു സമിതികളില്‍ അർഹമായ പ്രാതിനിധ്യം നല്‍കും.
വഖഫ് ബോർഡ് പക്ഷപാതപരമായിട്ടല്ല പ്രവർത്തിക്കുന്നത്. ഏതെങ്കിലും ഒരു പ്രത്യേക വിഭാഗത്തിന്റെ മാത്രം താത്പര്യം നോക്കാതെ, എല്ലാ സ്ഥാപനങ്ങളുടെയും പ്രശ്‌നങ്ങള്‍ ബോർഡ് നിഷ്പക്ഷമായി പരിഹരിക്കും. ഇതില്‍ വിഭാഗീയതയുടെ കാര്യമില്ലെന്നും തങ്ങള്‍ പറഞ്ഞു.
വഖഫ് ബോർഡ് പുനഃസംഘടനയില്‍ ഇതുവരെ ആരും നേരിട്ട് പരാതി ഉന്നയിച്ചിട്ടില്ല.
നിലവില്‍ ഹജ്ജ് കമ്മിറ്റി ചെയർമാൻ സ്ഥാനം വഹിക്കുന്നത് എപി. വിഭാഗത്തിന്റെ പ്രതിനിധിയാണ്. പുതിയ ബോർഡില്‍ സമസ്തയില്‍ നിന്ന് രണ്ട് പ്രതിനിധികളുണ്ട്.
ചെയർമാൻ സമസ്തയുടെ മുൻനിരയിലുള്ള ആളാണ്. കൂടാതെ മുസ്തഫല്‍ ഫൈസിയും സമസ്തയില്‍ നിന്നുള്ള പണ്ഡിതനാണ്.
വഖഫ് ബോർഡ് അംഗമാവാൻ മുശാവറ അംഗം തന്നെ ആകണമെന്ന നിർബന്ധമില്ലെന്നും, അർഹതയുള്ള കാറ്റഗറി അടിസ്ഥാനത്തിലാണ് അദ്ദേഹത്തെ ഉള്‍പ്പെടുത്തിയതെന്നും തങ്ങള്‍ വ്യക്തമാക്കി.
