തിരുവനന്തപുരം: വൈകുന്നേരങ്ങളിലെ വേണാട് എക്സ്പ്രസ്സിലെ രൂക്ഷമായ യാത്രക്കാരുടെ തിരക്കിന് പരിഹാരം കാണുന്നതിനായി എറണാകുളം - കോട്ടയം - ചെങ്ങന്നൂർ വഴി കൊല്ലത്തേക്ക് പുതിയ ട്രെയിൻ സർവീസ് ആരംഭിക്കുന്നതിന് റെയില്‍വേ മന്ത്രാലയത്തില്‍ നിന്ന് തത്വത്തില്‍ അംഗീകാരം ലഭിച്ചതായി കൊടിക്കുന്നില്‍ സുരേഷ് എം.പി.
റെയില്‍വേ മന്ത്രി അശ്വിനി വൈഷ്ണവിനെ സന്ദർശിച്ച്‌ യാത്രക്കാർ അനുഭവിക്കുന്ന ദുരിതങ്ങള്‍ വീഡിയോയും ചിത്രങ്ങളും അടക്കം കാണിച്ച്‌ ബോധ്യപ്പെടുത്തിയതിനെ തുടർന്നാണ് റെയില്‍വേയുടെ ഭാഗത്തുനിന്നും ഇത്തരത്തില്‍ ഒരു നടപടി സ്വീകരിച്ചത്.
മന്ത്രിയുടെ ഓഫീസില്‍ നിന്ന് ഇതുസംബന്ധിച്ച നിർദ്ദേശം റെയില്‍വേ ബോർഡിന് കൈമാറുകയും, തുടർന്ന് റെയില്‍വേ ബോർഡ് സതേണ്‍ റെയില്‍വേയിലെ ചീഫ് പാസഞ്ചർ ട്രാൻസ്പോർട്ടേഷൻ മാനേജർക്ക് ആവശ്യമായ നടപടികള്‍ക്കായി നിർദ്ദേശം നല്‍കിയതായും എം.പി. പറഞ്ഞു.
പുതിയ ട്രെയിനിന്റെ സർവീസ് 10 ദിവസത്തിനകം ആരംഭിക്കും.
സ്ത്രീകളും കുട്ടികളും മുതിർന്ന പൗരന്മാരും ഉള്‍പ്പെടെ നൂറുകണക്കിന് യാത്രക്കാർക്ക് ഇരിക്കാനോ നില്‍ക്കാനോ പോലും മതിയായ ഇടമില്ലാത്ത സാഹചര്യത്തില്‍ മണിക്കൂറുകളോളം യാത്ര ചെയ്യേണ്ടിവരുന്നതായി എം.പി. ചൂണ്ടിക്കാട്ടി.
ഓഫീസ് സമയം കഴിഞ്ഞ് എറണാകുളത്തുനിന്ന് കോട്ടയം, ചങ്ങനാശ്ശേരി, ചെങ്ങന്നൂർ, മാവേലിക്കര, കായംകുളം, കൊല്ലം, മേഖലകളിലേക്ക് മടങ്ങുന്ന ആയിരക്കണക്കിന് സ്ഥിരം യാത്രക്കാരെയാണ് ഈ ദുരിതം നേരിട്ട് ബാധിക്കുന്നത്. ഇതിന് അടിയന്തര പരിഹാരമായി വേണാട് എക്സ്പ്രസ് എറണാകുളത്തുനിന്ന് പുറപ്പെടുന്നതിന് മുമ്പായി ഒരു പുതിയ സർവീസ് ആരംഭിക്കണമെന്നായിരുന്നു എം.പി.യുടെ പ്രധാന ആവശ്യം.
ഇതിന്റെ അടിസ്ഥാനത്തിലാണ് വൈകിട്ട് ഏകദേശം 4 മണിയോടെ എറണാകുളം ജംഗ്ഷനില്‍ നിന്ന് പുറപ്പെടുന്ന തരത്തില്‍, വേണാട് എക്സ്പ്രസ്സിന് മുമ്പായി ഒരു പുതിയ പാസഞ്ചർ ട്രെയിൻ സർവീസ് ആരംഭിക്കുന്നതിനുള്ള നടപടികള്‍ പുരോഗമിക്കുന്നത്.
