അങ്കമാലി: അനുവദനീയമായതിലും അധികം ഭാരത്തിലും ഉയരത്തിലും ചരക്കുകള്‍ കയറ്റി സർവീസ് നടത്തിയതുള്‍പ്പെടെയുള്ള നിയമലംഘനങ്ങള്‍ കണ്ടെത്താൻ നടത്തിയ പ്രത്യേക പരിശോധനയില്‍ 51 വാഹനങ്ങള്‍ക്കെതിരെ നടപടി സ്വീകരിച്ചു.
എറണാകുളം എൻഫോഴ്‌സ്‌മെന്റ് ആർ ടി ഒയുടെ നേതൃത്വത്തില്‍ രണ്ട് സ്ക്വാഡുകളായി അങ്കമാലി, മഞ്ഞപ്ര, കരയാംപറമ്പ്, ഏഴാറ്റുമുഖം മേഖലകളിലായിരുന്നു പരിശോധന.
അമിതഭാരം കയറ്റിയ വാഹനങ്ങള്‍ ഗതാഗത തടസ്സങ്ങള്‍ സൃഷ്ടിക്കുന്നതിനൊപ്പം വൈദ്യുത ലൈനുകള്‍, പോസ്റ്റുകള്‍, മറ്റ് കേബിളുകള്‍ എന്നിവയ്ക്ക് നാശമുണ്ടാക്കുന്നതായും പരാതികള്‍ ഉയർന്നിരുന്നു. ഇതിന്റെ അടിസ്ഥാനത്തിലാണ് പരിശോധന നടത്തിയത്. അമിതഭാരം കയറ്റിയ രണ്ട് വാഹനങ്ങള്‍ പിടിച്ചെടുത്തു.
ഡ്രൈവിങ് ലൈസൻസ്, ഫിറ്റ്നസ് സർട്ടിഫിക്കറ്റ്, നികുതി എന്നിവ ഇല്ലാതെ വാഹനങ്ങള്‍ നിരത്തിലിറക്കിയതായും കണ്ടെത്തി.
വാഹനങ്ങളുടെ ബോഡിയില്‍ അനധികൃതമായി രൂപമാറ്റം വരുത്തിയതും സൈലൻസറില്‍ മാറ്റം വരുത്തിയതും ഉള്‍പ്പെടെയുള്ള നിയമലംഘനങ്ങളും പരിശോധനയില്‍ കണ്ടെത്തി. കോമ്പൗണ്ടിങ് ഫീസായി 36,500 രൂപ ഈടാക്കി.
