കോട്ടയം: നമ്മള്‍ കഴിക്കേണ്ട ഏറ്റവും ആരോഗ്യകരമായ ഭക്ഷണങ്ങളില്‍ മുന്നിലാണ് ഇലക്കറികള്‍.
ചീരയും മുരിങ്ങയിലയും അടക്കമുളള ഇലക്കറികള്‍ പണ്ടൊക്കെ നമ്മുടെ പറമ്പുകളില്‍ തന്നെ കിട്ടുമായിരുന്നു.
ഇന്നാകട്ടെ കടയില്‍ നിന്ന് വാങ്ങുകയാണ് വഴി.
അതുകൊണ്ട് തന്നെ അതിലൊരു വലിയ പ്രശ്നവും ഉണ്ട്. ഇലക്കറികള്‍ വാടിപ്പോകാതിരിക്കാനും കീടങ്ങള്‍ തിന്നാതിരിക്കാനും കീടനാശിനികള്‍ ഈ പച്ചക്കറികളില്‍ തളിച്ചിട്ടുണ്ടാകും.
പച്ചവെള്ളത്തില്‍ ചുമ്മാ കഴുകിയെടുത്താല്‍ മാത്രം ഈ കെമിക്കലുകള്‍ പോകില്ല. ഇലക്കറികളില്‍ നിന്ന് വിഷാംശം മാറ്റാൻ 5 എളുപ്പവഴികളിതാ.
വിനാഗിരി വെള്ളത്തില്‍ മുക്കി വെക്കുക
ഒരു പാത്രത്തില്‍ 3 കപ്പ് വെള്ളത്തിന് 1 കപ്പ് വിനാഗിരി എന്ന അളവില്‍ ചേർക്കുക. ഇലക്കറികള്‍ ഇതില്‍ 10-15 മിനിറ്റ് മുക്കി വെച്ച ശേഷം കൈകൊണ്ട് പതുക്കെ തിരുമ്മി, തണുത്ത വെള്ളത്തില്‍ കഴുകിയെടുക്കുക. ബാക്ടീരിയകളും കീടനാശിനികളും മാറാൻ ഇത് സഹായിക്കും.
ബേക്കിംഗ് സോഡ ലായനി
2 കപ്പ് വെള്ളത്തില്‍ 1 ടീസ്പൂണ്‍ ബേക്കിംഗ് സോഡ കലർത്തുക. ചീര, ലെറ്റൂസ് തുടങ്ങിയ പച്ചക്കറികള്‍ 12-15 മിനിറ്റ് ഈ വെള്ളത്തില്‍ ഇട്ടുവെക്കുക. ശേഷം നല്ല വെള്ളത്തില്‍ കഴുകിയെടുക്കുക.
പൈപ്പ് വെള്ളത്തില്‍ നന്നായി കഴുകുക
പാത്രത്തില്‍ വെള്ളമെടുത്ത് ഇലക്കറികള്‍ കഴുകുന്നതിന് പകരം പൈപ്പ് തുറന്നിട്ട് ഒഴുകുന്ന വെള്ളത്തില്‍ കുറഞ്ഞത് 30 സെക്കൻഡെങ്കിലും ഇലകള്‍ ഓരോന്നായി വിടർത്തി പതുക്കെ തിരുമ്മി കഴുകുക. ഇത് ഇലകളുടെ മുകളിലുളള പൊടിയും വിഷാംശങ്ങളും മാറ്റാൻ സഹായിക്കും.
പുറത്തെ ഇലകള്‍ മാറ്റുക
കാബേജ്, ലെറ്റൂസ് തുടങ്ങിയവയുടെ പുറമെയുള്ള ഇലകളിലാണ് കീടനാശിനികളും അഴുക്കും കൂടുതല്‍ പറ്റിപ്പിടിച്ചിരിക്കുന്നത്. അതിനാല്‍ പുറത്തെ ഇലകള്‍ നീക്കം ചെയ്ത ശേഷം വൃത്തിയായി കഴുകി ബാക്കിയുള്ള ഭാഗം മാത്രം ഭക്ഷണത്തിനായി ഉപയോഗിക്കുക.
ചെറുചൂടുള്ള ഉപ്പുവെള്ളം
ചെറുചൂടുള്ള വെള്ളത്തില്‍ 1 ടീസ്പൂണ്‍ ഉപ്പും കുറച്ച്‌ മഞ്ഞള്‍പ്പൊടിയും ചേർത്ത് ഇലക്കറികള്‍ കുറച്ചുസമയം അതില്‍ മുക്കി വെക്കക. അതിനുശേഷം തണുത്ത വെള്ളത്തില്‍ ഒരിക്കല്‍കൂടി കഴുകിയെടുത്താല്‍ കറികളുടെ രുചിയും ഗുണവും നഷ്ടപ്പെടാതെ വിഷാംശം മാറ്റിയെടുക്കാം.
