തിരുവനന്തപുരം: കെപിസിസി അധ്യക്ഷനൊപ്പം യുഡിഎഫ് കണ്‍വീനറും മാറുമോയെന്ന ചോദ്യത്തിന് മൗനം പാലിച്ച്‌ മന്ത്രി സണ്ണി ജോസഫ്.
എഐസിസി സമരമുഖത്തായതിനാല്‍ സംഘടനാകാര്യങ്ങള്‍ ചർച്ച ചെയ്യാൻ സമയം കിട്ടിയില്ലെന്നും അദ്ദേഹം പറഞ്ഞു. യുഡിഎഫ് കണ്‍വീനർ അടൂർ പ്രകാശിന്‍റെ പരസ്യപ്രസ്താവനകളും പാർട്ടിക്കുള്ളില്‍ വലിയ ചർച്ചയായ പശ്ചാത്തലത്തിലാണ് കെപിസിസി അധ്യക്ഷന്‍റെ പ്രതികരണം. ഇതേസംബന്ധിച്ച്‌, ഡല്‍ഹി കേരള ഹൗസില്‍ കെപിസിസി അധ്യക്ഷൻ സണ്ണി ജോസഫും മുഖ്യമന്ത്രി വി.ഡി സതീശനും തമ്മില്‍ നിർണായക കൂടിക്കാഴ്ച പുരോഗമിക്കുകയാണെന്നാണ് വിവരം.
മുഖ്യമന്ത്രിക്കെതിരെയും നേതൃത്വത്തിനെതിരെയും അടൂർ പ്രകാശ് നടത്തിയ പരസ്യമായ തുറന്നുപറച്ചിലുകളില്‍ കോണ്‍ഗ്രസിനുള്ളില്‍ തന്നെയും കടുത്ത അതൃപ്തിയാണ് നിലനില്‍ക്കുന്നത്. ഹൈക്കമാൻഡ് നേതാക്കളുടെയോ മറ്റ് മുതിർന്ന നേതാക്കളുടെയോ പിന്തുണ അദ്ദേഹത്തിന് ലഭിച്ചിട്ടില്ലെന്നാണ് സൂചന. പാർട്ടി വേദികളില്‍ പറയേണ്ട കാര്യങ്ങള്‍ പരസ്യമായി ഉന്നയിച്ചത് മുന്നണിയുടെ ഐക്യത്തെ ബാധിക്കുമെന്ന നിലപാടിലാണ് നേതൃത്വം. ഈ സാഹചര്യത്തിലാണ് കണ്‍വീനർ സ്ഥാനത്തുനിന്ന് അദ്ദേഹത്തെ മാറ്റുന്നത് സംബന്ധിച്ച ആലോചനകള്‍ കോണ്‍ഗ്രസിനുള്ളില്‍ സജീവമായത്.
അതേസമയം, അടൂർ പ്രകാശിനെ മാറ്റുന്നതില്‍ പാർട്ടിക്ക് മുന്നില്‍ ചില പ്രായോഗിക തടസ്സങ്ങളുമുണ്ട്. എഐസിസി നേരിട്ട് സമുദായ സന്തുലിതത്വം പാലിച്ചുകൊണ്ടാണ് അദ്ദേഹത്തെ ഈ പദവിയിലേക്ക് നിയമിച്ചിരുന്നത്. നിലവിലെ സാഹചര്യത്തില്‍ ഈഴവ വിഭാഗത്തില്‍ നിന്ന് മറ്റൊരു നേതാവിനെ പെട്ടെന്ന് ആ സ്ഥാനത്തേക്ക് കണ്ടെത്തുകയെന്നത് കോണ്‍ഗ്രസിനെയും യുഡിഎഫിനെയും സംബന്ധിച്ചിടത്തോളം വലിയൊരു പ്രതിസന്ധിയാണ്. എന്നാല്‍, തന്നെ കണ്‍വീനർ സ്ഥാനത്തുനിന്ന് മാറ്റിയാല്‍ ആ നടപടി പോലും ഏറ്റെടുക്കാൻ തയ്യാറാണെന്നും തനിക്ക് ആരെയും ഭയമില്ലെന്നുമാണ് അടൂർ പ്രകാശ് വ്യക്തമാക്കിയത്.
സംസ്ഥാന കോണ്‍ഗ്രസിലെയും യുഡിഎഫ് മുന്നണിക്കകത്തെയും പുതിയ ചേരിപോരുകള്‍ക്കിടയില്‍, ഡല്‍ഹിയിലെ കൂടിക്കാഴ്ച പാർട്ടിയില്‍ നിർണായകമായേക്കുമെന്നാണ് റിപ്പോർട്ടുകള്‍.
