തിരുവനന്തപുരം: കാപ്പാ കേസില്‍ ജയിലിലായ കൗണ്‍സിലർ ആർ സുഗതന് വേണ്ടി കൗണ്‍സില്‍ അറ്റൻഡൻസ് രജിസ്റ്ററില്‍ കൃത്രിമം കാട്ടിയെന്ന എല്‍ ഡി എഫ് നേതാവ് അഡ്വ.എസ് പി ദീപക്കിന്റെ ആരോപണങ്ങള്‍ പൂർണ്ണമായി തള്ളി തിരുവനന്തപുരം മേയർ വി വി രാജേഷ്.
നിലവില്‍ ചണ്ഡിഗഢില്‍ ഓള്‍ ഇന്ത്യ മേയേഴ്സ് കോണ്‍ഫറൻസില്‍ പങ്കെടുക്കുന്ന മേയർ, ഫേസ്ബുക്ക് കുറിപ്പിലൂടെയാണ് പ്രതിപക്ഷത്തിന് മറുപടി നല്‍കിയത്.
തിരുവനന്തപുരം കോർപ്പറേഷൻ സിസ്റ്റത്തെയും ഉദ്യോഗസ്ഥരെയും സംശയനിഴലില്‍ നിർത്തി രാഷ്ട്രീയലാഭം കൊയ്യാനുള്ള ശ്രമമാണ് നടക്കുന്നതെന്നും ആരോപണം വെറും രാഷ്ട്രീയമായി കാണാതെ അറ്റൻഡൻസ് രജിസ്റ്ററിലെ ഒപ്പ് നിയമപരമായി ഫോറൻസിക് പരിശോധനയ്ക്ക് അയക്കാൻ തയ്യാറാണെന്നും അദ്ദേഹം വ്യക്തമാക്കി.
സി സി ടി വി ദൃശ്യങ്ങളും ചിത്രങ്ങളും കോടതി മുഖേന പരിശോധിക്കാമെന്ന് വെല്ലുവിളിച്ച മേയർ, വാസ്തവവിരുദ്ധമായ പ്രചരണങ്ങള്‍ക്കെതിരെ നിയമനടപടി ആരംഭിക്കുകയാണെന്നും കോർപ്പറേഷന്റെ വികസന പദ്ധതികളുമായി ഒരിഞ്ച് പിന്നോട്ടില്ലാതെ ശക്തമായി മുന്നോട്ടുപോകുമെന്നും കൂട്ടിച്ചേർത്തു.
