തിരുവനന്തപുരം: രാജി കാര്യത്തില്‍ താല്‍ക്കാലിക വെടിനിര്‍ത്തല്‍ സാധ്യമായെങ്കിലും ഐപിഎസ് മേല്‍വിലാസം കൊണ്ട് പാർട്ടിയുടെ പ്രതിച്ഛായ കൂട്ടാമെന്ന കണക്കുകൂട്ടലുകള്‍ തെറ്റിച്ചുകൊണ്ട് ആർ ശ്രീലേഖ ബിജെപിക്ക് വലിയ ബാധ്യതയായി മാറുന്നു.
പൊതുസമൂഹത്തില്‍ പാർട്ടിയെ നാണം കെടുത്തുന്ന പ്രസ്താവനകളും വ്യക്തിപരമായ അജണ്ടകള്‍ക്ക് വേണ്ടിയുള്ള പരസ്യ കലഹങ്ങളും മാത്രമാണ് ഈ കാലയളവില്‍ ശ്രീലേഖ ബിജെപിക്ക് നല്‍കിയ സംഭാവന.
നേതാക്കള്‍ക്ക് കൈകൊടുക്കാതെ മാറിനിന്നും വിജയാഘോഷങ്ങള്‍ ബഹിഷ്കരിച്ചും അച്ചടക്കത്തിന്റെ എല്ലാ അതിർ വരമ്പുകളും ലംഘിച്ച ശ്രീലേഖയെ മുന്നോട്ട് എങ്ങനെ കൊണ്ടുപോകുമെന്നത് ബിജെപിക്ക് മുന്നിലെ വലിയ ചോദ്യചിഹ്നമാണ്.
പ്രധാനമന്ത്രി തിരുവനന്തപുരത്ത് വന്നപ്പോള്‍ ആ വേദിയുടെ കോണില്‍ ആള്‍ക്കൂട്ടത്തില്‍ നിന്ന് തെറിച്ചുവീണതുപോലെ ശ്രീലേഖ ഒറ്റയ്ക്ക് നിന്ന കാഴ്ച നമ്മള്‍ കണ്ടതാണ്.
മുൻ ഐപിഎസ് ഉദ്യോഗസ്ഥ എന്ന തലയെടുപ്പോടെ ബിജെപിയിലേക്ക് കടന്നുവന്ന ആർ ശ്രീലേഖയുടെ രാഷ്ട്രീയ ഗ്രാഫ് ഇന്ന് എവിടെ നില്‍ക്കുന്നു എന്ന ചോദ്യത്തിന് പാർട്ടിക്കുള്ളില്‍ നിന്ന് ലഭിക്കുന്ന ഉത്തരം ഒന്നാണ് - 'ബിജെപിയെ നിരന്തരം സമ്മർദ്ദത്തില്‍ ആക്കുന്ന അച്ചടക്കമില്ലാത്ത ബാധ്യത'.
ടി.പി സെൻകുമാറിന്‍റെയും ജേക്കബ് തോമസിന്‍റെയും വരവിന് പിന്നാലെ തലസ്ഥാന രാഷ്ട്രീയത്തിലേക്ക് കടന്നുവന്ന മുൻ ഡിജിപി കൂടിയായ ആർ ശ്രീലേഖ, തുടക്കം മുതല്‍ പദവികളെച്ചൊല്ലിയുള്ള അമർഷങ്ങളും പരസ്യ നിലപാടുകളും കൊണ്ട് ബിജെപി നേതൃത്വത്തിന് ആവർത്തിച്ച്‌ തലവേദന സൃഷ്ടിക്കുന്നതാണ് കാണുന്നത്.
ഐപിഎസ് കരിയറിലുടനീളം വിവാദങ്ങള്‍ നിഴല്‍പോലെ പിന്തുടർന്ന ഉദ്യോഗസ്ഥയായിരുന്നു ശ്രീലേഖ. അന്വേഷണ ചുമതല വഹിച്ച, നടി ആക്രമിക്കപ്പെട്ട കേസില്‍ നടൻ ദിലീപിനെ പരസ്യമായി പിന്തുണച്ച്‌ പ്രസ്താവന നടത്തിയതോടെയാണ് പൊതുസമൂഹത്തില്‍ വലിയ രീതിയിലുള്ള വിമർശനങ്ങള്‍ ഉയർന്നത്.
എന്നാല്‍, ഔദ്യോഗിക ജീവിതത്തില്‍ നിന്നിറങ്ങിയ ഉടൻ ബിജെപി സംസ്ഥാന ഭാരവാഹിത്വത്തിലേക്ക് ഉയർന്ന ശ്രീലേഖയെ പാർട്ടി തദ്ദേശ തിരഞ്ഞെടുപ്പില്‍ തുറുപ്പുചീട്ടായാണ് അവതരിപ്പിച്ചത്.
തദ്ദേശ തിരഞ്ഞെടുപ്പില്‍ ശാസ്തമംഗലത്തു നിന്ന് കൗണ്‍സിലറായി ജയിച്ചെങ്കിലും മേയർ പദവി നല്‍കാത്തതില്‍ ശ്രീലേഖ പരസ്യമായി പ്രതിഷേധിക്കുകയായിരുന്നു. ഡെപ്യൂട്ടി മേയർ പദവി പോലും ലഭിക്കാതിരുന്നതോടെ അമർഷം പരസ്യ പ്രകടനങ്ങളിലേക്ക് വഴിമാറി.
പ്രധാനമന്ത്രി പങ്കെടുത്ത തിരുവനന്തപുരം നഗരസഭയിലെ ബിജെപിയുടെ വിജയാഘോഷത്തിൻെറ ഔദ്യോഗിക വേദിയില്‍ പാർട്ടി നേതാക്കള്‍ക്ക് കൈ കൊടുക്കാതെ മാറിനിന്നതും, നഗരസഭാ കൗണ്‍സിലർമാർ ഡല്‍ഹിക്ക് പോയപ്പോള്‍ വിട്ടുനിന്നതും പാർട്ടിക്കുള്ളില്‍ വലിയ അച്ചടക്കലംഘനമായി വിലയിരുത്തപ്പെട്ടു
തുടർന്ന് വന്ന നിയമസഭാ തിരഞ്ഞെടുപ്പില്‍ വട്ടിയൂർക്കാവില്‍ മത്സരിച്ചെങ്കിലും ബിജെപി പ്രതീക്ഷിച്ച മുന്നേറ്റമുണ്ടാക്കാൻ കഴിഞ്ഞില്ല.
മൂന്നാം സ്ഥാനത്തേക്ക് തള്ളപ്പെട്ടതിന് പുറമേ, തിരഞ്ഞെടുപ്പ് പ്രചാരണ ഫ്ലക്സുകളില്‍ മുൻ പദവിയായ 'ഐപിഎസ്' എന്ന് ദുരുപയോഗം ചെയ്ത് ചേർത്തതിന് തിരഞ്ഞെടുപ്പ് കമ്മീഷന്റെ വിലക്ക് വാങ്ങിയതും പാർട്ടിയെ നാണം കെടുത്തി.
ശാസ്തമംഗലത്തെ കോർപ്പറേഷൻ കെട്ടിടത്തിലെ ഓഫീസുമായി ബന്ധപ്പെട്ട് വട്ടിയൂർക്കാവ് എംഎല്‍എ വി.കെ പ്രശാന്തുമായി നടത്തിയ കൊമ്പുകോർക്കല്‍ അനാവശ്യ രാഷ്ട്രീയ തർക്കങ്ങള്‍ക്ക് വഴിതുറന്നു.
ഓഫീസ് ഒഴിയണമെന്ന ആവശ്യം എംഎല്‍എ നിരസിച്ചതോടെ വിഷയം വ്യക്തിപരമായ വാശിപിടുത്തമായി മാറുകയായിരുന്നു.
രാഷ്ട്രീയത്തില്‍ പ്രവർത്തിച്ച്‌ അനുഭവ സമ്പത്തില്ലാത്ത ശ്രീലേഖയുടെ പരിചയക്കുറവും പലപ്പോഴും ബിജെപിക്ക് ബാധ്യത ആയി മാറിയിരുന്നു.
വട്ടിയൂർക്കാവിലെ രാഷ്ട്രീയ തർക്കങ്ങളുടെ ഭാഗമായി ബിജെപി സംഘടിപ്പിച്ച പ്രതിഷേധ മാർച്ചില്‍ മുൻ ഉയർന്ന പോലീസ് ഉദ്യോഗസ്ഥയായ ശ്രീലേഖ തന്നെ പോലീസിനെതിരെ അധിക്ഷേപ മുദ്രാവാക്യം വിളിച്ചത് പൊതുസമൂഹത്തില്‍ വലിയ എതിർപ്പ് ഉണ്ടാക്കി.
ഒരു മുൻ ഡിജിപി നിയമപാലകരെ പരസ്യമായി തെരുവില്‍ ആക്ഷേപിക്കുന്നത് ബിജെപിയുടെ ക്രമസമാധാന നിലപാടുകള്‍ക്ക് തന്നെ തിരിച്ചടിയായി മാറുകയാണുണ്ടായത്.
ഓരോ തവണയും പാർട്ടിയെ നാണം കെടുത്തുന്ന വിവാദങ്ങള്‍ ഉണ്ടാക്കിയ ശേഷം, "വിഷയങ്ങള്‍ മാധ്യമങ്ങള്‍ വളച്ചൊടിച്ചതാണ്" എന്ന സ്ഥിരം വിശദീകരണവുമായി രംഗത്തെത്തുന്ന ശ്രീലേഖയുടെ രീതി നേതൃത്വത്തിന് വലിയ മടുപ്പാണ് ഉണ്ടാക്കിയിട്ടുള്ളത്.
