തിരുവനന്തപുരം: തിരുവനന്തപുരം അന്താരാഷ്ട്ര വിമാനത്താവളം വഴിയുള്ള ആഭ്യന്തര ചരക്ക് നീക്കത്തില്‍ റെക്കോർഡ്. ഒക്ടോബറില്‍ 444 മെട്രിക് ടണ്‍ ആഭ്യന്തര ചരക്കാണ് കൈകാര്യം ചെയ്തത്.
2026 ജൂണില്‍ രേഖപ്പെടുത്തിയ 406 മെട്രിക് ടണ്‍ ആയിരുന്നു ഇതുവരെയുള്ള ഏറ്റവും ഉയർന്ന പ്രതിമാസ നേട്ടം. ഇതിനെ അപേക്ഷിച്ച്‌ 9.4 ശതമാനം വർധനവാണ് ഒക്ടോബറില്‍ കൈവരിച്ചത്. മുൻ റെക്കോർഡിനേക്കാള്‍ 38 മെട്രിക് ടണ്‍ അധികം ചരക്ക് ഈ മാസം കൈകാര്യം ചെയ്തു.
കേരളത്തില്‍ നിന്നുള്ള വിമാന ചരക്ക് സേവനങ്ങള്‍ക്കുള്ള വർധിച്ചുവരുന്ന ആവശ്യകതയും വിമാനത്താവളത്തിന്റെ ആഭ്യന്തര ചരക്ക് ശൃംഖലയില്‍ ബിസിനസ് സ്ഥാപനങ്ങള്‍, കൊറിയർ ഓപ്പറേറ്റർമാർ, ലോജിസ്റ്റിക്സ് പങ്കാളികള്‍ എന്നിവരുടെ വർധിച്ച പങ്കാളിത്തവുമാണ് ഈ നേട്ടത്തിന് പിന്നില്‍.
രാജ്യത്തെ പ്രധാന വാണിജ്യ കേന്ദ്രങ്ങളുമായി കേരളത്തെ ബന്ധിപ്പിക്കുന്നതില്‍ വിമാനത്താവളം നിർണായക പങ്കുവഹിക്കുന്നെന്ന് അധികൃതർ പറയുന്നു.
മൊബൈല്‍ ഫോണുകള്‍, ലെൻസുകള്‍, കൊറിയർ ചരക്കുകള്‍ വളർച്ചയ്ക്ക് കരുത്തേകി.ചരക്ക് നീക്കത്തിലെ വർധനവിന് പ്രധാന സംഭാവന നല്‍കിയത് മൊബൈല്‍ ഫോണുകളാണ്.
ഡല്‍ഹിയില്‍ നിന്നുള്ള മൊബൈല്‍ ഫോണ്‍ വരവില്‍ ഗണ്യമായ വർധന രേഖപ്പെടുത്തി. മുംബൈയില്‍ നിന്നുള്ള ഒപ്റ്റിക്കല്‍ ലെൻസുകളുടെ വരവിലും വർധനവുണ്ടായി.
കൊറിയർ, കണ്‍സോളിഡേറ്റഡ് കാർഗോ പ്രവർത്തനങ്ങളിലും പുരോഗതിയുണ്ടായി. നേരത്തെ കൊച്ചി വഴി കൈകാര്യം ചെയ്തിരുന്ന ഔട്ട്ബൗണ്ട് കണ്‍സോളിഡേറ്റഡ് കാർഗോ സേവന ദാതാക്കളില്‍ ചിലർ തിരുവനന്തപുരത്തു നിന്ന് പ്രവർത്തനം ആരംഭിച്ചിട്ടുണ്ട്. ഇൻബൗണ്ട് കണ്‍സോളിഡേറ്റഡ് കാർഗോയുടെ അളവിലും വർധന രേഖപ്പെടുത്തി.
പോസ്റ്റ് ഓഫീസ് മെയില്‍ വിഭാഗത്തിലും ഇൻബൗണ്ട്, ഔട്ട്ബൗണ്ട് ചരക്കുനീക്കങ്ങളില്‍ വളർച്ചയുണ്ടായിട്ടുണ്ട്. ബെംഗളൂരു, മുംബൈ, ഡല്‍ഹി, ചെന്നൈ, ഹൈദരാബാദ് എന്നിവയാണ് തിരുവനന്തപുരം വിമാനത്താവളത്തിലൂടെയുള്ള ആഭ്യന്തര ചരക്കുനീക്കത്തിലെ പ്രധാന അഞ്ച് നഗരങ്ങള്‍. രാജ്യത്തെ പ്രധാന വാണിജ്യ, ലോജിസ്റ്റിക്സ് കേന്ദ്രങ്ങളുമായുള്ള വിമാനത്താവളത്തിന്റെ വർധിച്ചുവരുന്ന ചരക്ക് കണക്റ്റിവിറ്റിയാണ് ഇത് വ്യക്തമാക്കുന്നത്. വിഴിഞ്ഞം അന്താരാഷ്ട്ര തുറമുഖത്ത് എക്സിം (കയറ്റുമതി-ഇറക്കുമതി) പ്രവർത്തനങ്ങള്‍ ആരംഭിച്ചത് മേഖലയിലെ ലോജിസ്റ്റിക്സ് രംഗത്ത് പുതിയ അവസരങ്ങള്‍ തുറക്കുമെന്നാണ് പ്രതീക്ഷിക്കുന്നത്. തുറമുഖവും തിരുവനന്തപുരം അന്താരാഷ്ട്ര വിമാനത്താവളവും തമ്മിലുള്ള വർധിച്ചുവരുന്ന സഹകരണം വിവിധ ഗതാഗത മാർഗങ്ങള്‍ സംയോജിപ്പിച്ചുള്ള ചരക്കുനീക്കം കൂടുതല്‍ ശക്തിപ്പെടുത്തും. ആഭ്യന്തര വിമാന ചരക്കുനീക്കത്തിന് അധിക ആവശ്യകത സൃഷ്ടിക്കുന്നതിനും തിരുവനന്തപുരത്തെ വളർന്നുവരുന്ന സംയോജിത ലോജിസ്റ്റിക്സ് ഹബ്ബായി ഉയർത്തുന്നതിനും ഇത് സഹായകമാകുമെന്നാണ് പ്രതീക്ഷ.
